Hontrade Ṭhazual Lengzem-ah A zawna No.1 hauh thei DJ Lalvenhimi

DJ Lalvenhimi chu 'A pawi emai' tih hla a tihchhuah hnuah chart-ah a hmel kan hmu nghal a, tunah chuan a zawnin No. 1 a hauh leh ta der mai.

Hontrade Ṭhazual Lengzem chart-ah hian DJ-i hian dinhmun sang ber a zawnin a luah ta a, khum thei an la awm lo. Tunlai lengzem hla thlan hlawh ber 'A pawi emai' tih hla hi John Hnamte phuah niin, April thla khan tlangzarh a ni. Local channel lamah thlan a hlawh tluk zet hian YouTube lamah pawh en a hlawh hle a ni. Dj-i hian Ṭhazual Lengzem chart-ah record ṭha tak a lo hnutchhiah tawh a, music video thar nen bul a ṭan thar leh mek a ni.

Tun ṭum chart-ah hian Mathlenga chu palina aṭang­in pahnihna-ah a invawrh chho a, F. Zomuanpuia a nek chhuak. Mathleng hla 'Vanglai nun' hi chart-ah a lang rei ta hle a, dinhmun sang ber luah thei turin a dinhmun a ṭha hle. 'Jerusha' tih hla mawi taka satu David chu a top 3-ah a inhlangkai bawk a, H. Lalvulmawia a luahlan.

Ṭum dang ang bawkin F. Zomuanpuia a che ṭha leh tho a, 'Lo let leh la' tih hla nen top 5-ah a inham tang. Manuna pawhin 'Awm khawhar changin' tih hla hmangin hma lam a pan ve zel bawk.

Hetih lai hian 'Ka perhkhuang ṭingṭang' tih hla mawi taka satu H. Lalvulmawia chu parukna-ah a tla thla a, Malsawmtluanga-a'n a dawt. Isaac Chhangte, Sammy Vangchhia leh Sangkimi Khiangte te chu top 10-ah an inhlangkai bawk. Sangkimi Khiangte hian tun hnai khan hla thar a tichhuak a, a sang zual zingah a inhlangkai nghal a ni.

Hontrade International Ṭhazual Lengzem Top 10
1. DJ Lalvenhimi - A pawi emai
2. Mathlenga - Vanglai nun
3. David - Jerusha
4. F. Zomuanpuia - Lo let leh la
5. Manuna - Awm khawhar changin
6. H. Lalvulmawia - Ka perhkhuang ṭingṭang
7. Malsawmtluanga - Nunkawng hreawm
8. Isaac Chhangte - Bingtaii
9. Sammy Vangchhia - Si ar te
10. Sangkimi Khiangte - In tel lo chuan