Vanduaina tawkte tan Live-Phone-In leh charity concert buatsaih

Vanduaina tawkte tana luangchhuak ṭhin PUMP (People United in Music with a Purpose)-te chuan ṭum danga an lo tawh tih ṭhin angin, mamawhtute tan luanchhuahna an nei leh dawn.

Nizan dar 8:00 aṭang khan Live-Phone-In programme an ṭan a, Zonet Bawhbel leh LPS 10-ahte live-a pekchhuah niin, zaninah chhunzawm a ni ang. June 14, Ningani hian Aizawl veng hrang hrangah Mobile Charity Concert an buatsaih leh dawn bawk.

Kuminah Zoram hmun hrang hrangah vanduaina a thleng a, nunna chan leh hliam tuar mi eng emaw zat an awm tawh a ni. In leh lo chan pawh chungkaw eng emaw zat an awm tawh a, heng mite hian ṭanpui an ngai tih hriaiin PUMP te hian ke an rawn penchhuak leh ta a ni.

Live-Phone-In-ah hian mipuiten vanduaina tawkte hnenah ṭanpuina ṭhahnem tak an pe tawh a, zanin dar 8:00-ah chhun­zawm leh a ni ang. Programme neih chhung hian zaitiamte an zai a, zaninah pawh zaithiam - Cindy, Feli Fanai, DJ-i, Cardinal Choir, Mami Varte leh Zoramchhani bakah midang ṭhahnem tak an zai dawn a ni. Ṭanpuina pe duh tan hian PUMP SBI account - 33026547405 (IFS Code - SBIN0016361)-ah pek theih reng a ni bawk.

Ningani hian Mobile Charity Concert an buatsaih leh dawn bawk a, veng hrang hrangah bawm hun a ni ang. Hemi atan hian Active Sound-te chuan sound system an mamawh angte an chhawpsak dawn a ni.

PUMP hian cheng nuai 30 vel zet chu ṭan­puina hi an lo sem chhuak tawh a, tun ṭumah pawh hian vanduaina tawkte tana mahni phal ang tawk lo pe leh turin mipui an ngen a ni.