FIFA World Cup opening ceremony-ah Robbie Williams

June 14 hian FIFA World Cup 2018 chu khelh ṭan a ni tawh dawn a, opening ceremony-a inlan turte pawh puan a ni tawh. English singer Robbie Williams chuan zaiin mipui a awi dawn a, a ni bakh hian midang eng emaw zat an inlan dawn bawk.

'Greatest Show On Earth" khuh hawnna hi Luzhniki Stadium, Moscow-ah neih a ni ang. He stadium hi mi 80,000 vel lenna niin, Russia-a stadium lian leh lar ber pawl a ni. Moscow khawpuiah tho hian stadium chhunga leng lo tan Red Square-ah concert pui tak buatsaih a ni dawn bawk a, Placido Dominguez leh Opera singer Juan Diego Florez te an perform dawn a ni.

Opening ceremony hi a pui lehpek hle dawn a, mit leh beng a tlai dawn tih a chiang. Will Smith leh Nicky Jam te chuan official song 'Live It Up' an sa dun tur hi hmaih phal chi a ni lo. Global music icon Robbie Williams chuan stadium-a mipui pungkhawmte a awi dawn a, a thlengtu Russia lamin Aida Garifullina an tehchhuak dawn bawk. Robbie Williams chuan, "Football fans 80,000 chuang hmaa zai hi ka lo suangtuah ṭhin chu a ni" tiin a phur tawh thu a sawi.