July-ah Dina Jathang album 'Zunleng Di I zun'

Tunlai Zoram khaw­vela lengzem hla nalh tak tak chhawpchhuak ṭhintu Dina Jathang chuan July thla hian a music video album pahnihna tur a tichhuak leh dawn. A album pahnihna tur hi 'Zunleng Di I zun' tih a ni a, peihfel a ni ṭep tawh.

Dina Jathang hi tunlai hlaphuah thiam zingah chuan hmasawn chak leh beiseiawm ber pawl a ni chho mek a, mi hriat pawh a hlawh cho ṭan viau. Amah hi composer a nih bakah producer niin, artist thar ṭha tak tak a cherchhuak nual tawh a ni. Chung zingah chuan Zonet Ṭhazual chart lamah kan hmuh fo ṭhin - Jenny Jathang leh H.Lalvulmawia te pawh an tel. Anni bakah hian H.T Lalthanzami leh F. Zomuanpuia te pawh Zoram mipui hriata phochhuaktu a ni.

Dina Jathang hian Ṭhazual chart-a lang phak hla a nei nual tawh a, dinhmun sang ber thleng phak pawh chhiar tham a nei tawh a ni. Tun ṭuma a album tihchhuah tur pawh hi ṭhalaite lawm zawng tak a ni leh dawn a, artist thar leh naupang zawk pawh hmuh tur an awm leh dawn a ni.

Video hi BS Pic­ture, Peter Video Pro­duction leh Chhangte Film te kutchuak a ni dawn a, Lunglei lama videographer ṭha ber pawl Chhangte Film neitu RP-a'n a pui bawk. Recording hi Melody Recording Studio-ah neih niin, music hi Marinmawia leh JT Production kut chhuak a ni thung.