Mizoram’s Got Talent Quarter final zo fel; karlehah Semi final

Runmawi buatsaih Mizoram’s Got Talent, October 4 aṭanga neih ṭan chu Inrinni, November 6 khan Quarter final zawh fel a ni a, semi final lut 48 an awm bakah Act 4 in Golden Buzzer hmuin final an tlang nghal.

MGT-ah hian Mizoram chhung mai ni lo, Zoram pawn aṭanga tel te pawh awmin an thiam thil hrang hrang hmangin an inel a, Mizorama kan la hmuh ngai zen zen loh talent dangdai tak tak hmuh turte pawh a awm a, thlir a manhla viau mai.

Quarter final chu LPS 10 leh Runmawi App-ah live-a pek chhuah ṭhin niin he round paltlangte hian November 16, 17 leh 18 hian semi final round inelna an nei leh dawn a, Runmawi app-ah chauh pek chhuah tawh tur a ni thung. App aṭang hian Rs. 50 chauhin Semi-final, Final leh Grand finale thleng live-in a en theih dawn a ni. Runmawi App hi android(Playstore-ah), ios (Appstore-ah) leh desktop tan download tur a awm a, runmawi.com ah download-na tur dah vek a ni bawk.

Semi final round aṭang hian Voting System kalpui tur a ni a, mipui vote chuan 50% lai puin, Judge vote 50% nen belhkhawm leh a ni ang. Runmawi App-ah vote hi thlak tur a ni a, mipui vote hi a hlu dawn hle.

Pensy B Lalthlengliani, Alan Rinawma, Lalnunkunga Sailo leh Vanlalsailova-te chuan MGT-a telte hi an endik a, show a pakhatna chuan Rs. 3,00,000 a dawng dawn a ni., Pahnihnain Rs. 1,50,000, pathumnain Rs. 60,000 an dawng anga, final a lut zawng zawngte'n Rs. 20,000 an dawng ṭheuh dawn bawk a ni.