7th Annual Ṭhazual Award ; Hming langsar zual pahnihte chu

Zonet Ṭhazual Award Ningani leh Zirtawpni zana sem tura nomination list hi October 18 khan puanzar a ni tawh a, chutah chuan Maruati leh JT Production-te chu nomination hmu tam ber niin pali ve ve an hmu.

Manuna, Jaui, Siampuii Ralte leh Kimkima-te chu Lengzem lamah category pathum-ah an hming a lang a, Gospel lamah chuan Benjamin Colney leh Hlimhlimi hming hmun thumah hmuh tur a awm ve bawk.

Gospel-a nomination hmu tam ber Maruati
Nikum leh kum hmasa lama Best female artist Gospel award dawngtu Maruati bawk kuminah a hming a langsar leh ta.

Maruati hming hi Song of the Year Gospel-ah pahnih lai a lang a, 'Ka thinlungah a nung' a sak chu a lanpui bakah Hlimhlimi nena an sak 'Uain thar' chu a lanpui. Hlimhlimi nena an thawhdunna hi Best Group/Duo Gospel-ah a lang bawk a, tin, amah hi Best female artist Gospel award dawng thei zingah a tel bawk a ni. A hla sak 'Ka thinlungah a nung' phuahtu chu Best Songwriter Gospel nominee-ah a la tel cheu bawk.

Maruati hian kuminah hian award pakhat aia tam a hum haw a nih pawhin a mak lo ang.

Lengzem lama langsar ber JT Production
Hla a phuah thiam a, a zai thiam bawk a, JT Production chu kumin Ṭhazual Award Lengzem huanga nomination hmu tam ber a ni.

JT Production hi Best male artist Lengzem dawng thei tur zingah a hming a lang a, Siampuii Ralte a thawhpuina 'Ka hmangaih te' avangin Best group/duo award hum haw thei zingah a tel a, tin, he hla avang vek hian Best songwriter Lengzem-ah a hming a lang bawk a ni. 'Ka hmangaih te' hi Song of the Year dawng thei tur zinga chhawp chhuah ni bawkin kumin hi JT Production bawr haw zan a ni dawn em tih chu Zirtawpni zanah a hriat theih ang.