'Eternals' a che ṭha nghal

Marvel Cinematic Universe film 'Eternals' chu Zirtawpni liam ta khan US-ah tlangzarh a ni a, rin lawk ang ngeiin sum pawh a lalut tam nghal hle.

'Eternals' a che ṭha, beisei erawh a pha lo deuh?
MCU phase four film 'Eternals' hian kar tawp liam ta chhung khan theatre 4,090 aṭangin $71,297,219 a lalut a, Box Office chart-ah pawh pakhatna a ni nghal.

Hetiang zat sum lalut thei hi chu lawma zuan tawr tawrna tham a ni a, Hollywood film hrang hrang ngaituah pawhin hetiang zat sum tlangzarh kara lalut nghal thei chu tam tak an ni lo ang. Mahse 'Eternals' hi MCU film a ni miau a, Marvel film-ah chuan miin beisei an nei sang ṭhin a, tun kar tawpah pawh khan $mtd 75-80 chu a lo berah a lakluh theih film lam tuipuitute chuan an ring hlawm.

Oscar hial dawng thei film 'Nomadland' director-in a direct 'Eternals' film-ah hian film lam review-tute ngaihdan a inang hle nghe nghe a, ṭhenkhatin an fak viau laiin ṭhenkhat erawh chuan an beisei ang an hmuh loh thu an sawi thung. Rotten Tomatoes-ah pawh rating 5.6/10 vel a hmu a, mi 307 vel laiin an review aṭangin hetiang zat rating hi a hmu a, film entute ngaihdan a inchen lo viau tih a hriat.

'Eternals' hi $mtd 200 vel senga an siam a ni a, North America pawn lamah tunkar tawp liam ta chhung khan $90,100,305 lai lalut bawkin a sum lakluh tawh zawng zawng zat chu $161,397,524 a ni tawh.

Dune leh No Time to Die

Budget tam tham taka an siam film, kar hmasa lama pakhatna ni bawk 'Dune' chu pahnihna a ni thung a, an sum lakluh erawh 'Eternals' nen a inthlau rem rem hle. Dune hian kar tawp liam ta chhung khan theatre 3,546 aṭangin $7,790,194 a lalut a ni.

Pathumna chu James Bond film 25-na 'No Time to Die' kha niin theatre 3007 aṭangin $6,038,799 a lalut.

Spencer sum lakluh a tlem, nga ti nge?
Kristen Stewart channa Lady Diana biographical drama film 'Spencer' pawh Zirtawpni khan US leh UK-ah tlangzarh a ni a, US lamah erawh film sum lalut tam pakuana a ni pha ṭawk! Mahse, 'Spencer' hi theatre 996-ah chiah chhuah a ni thung a, chuta aṭang chuan $2,104,767 lai a lalut tho a, film review-tu lamin an fak rawn a ni ber. Rotten Tomatoes-ah pawh mi 195-in review-in, rating 7.7/10 a hmu nghal a ni.