FIFA World Cup 2018 ; Dar 8:00-ah Opening Ceremony ; Robbie Williams inlar dawn

Khawvelin a nghahhleh FIFA World Cup 2018 chu zanin dar 8 hian a khuhhawnna neih a ni dawn ta a, football ngaina ve lem lo te pawhin Russia lam an hawi ṭhup dawn! Opening ceremony-ah hian Robbie Williams a inlar dawn a, entu mipui mit leh beng a tlai dawn.

A thlengtu Russia leh Saudi Arabia te chuan dar 8:30-ah match hmasa ber an khel dawn a, hemi hma darkar chanve la awmah hian a khuhhawnna neih a ni ang. Russia khawpui Moscow-ah pawh an stadium chhuanvawr Luzhniki Stadium-ah a opening ceremony hi neih a ni dawn a, mipui 80,000 velin a hmunah an chhim thei dawn a ni.

Robbie Williams show
English singer Robbie Wil­liams chuan Luzhniki Stadium-a mipui pungkhawm te zaiin a awi dawn a, amah pawh a phur tawh hle. Global music icon Robbie William chuan, "Show hriar reng tawh tur a ni ngei ang" tiin a lo sawi lawk tawh a ni.

'Angels' singer Robbie William chuan, "Russia khawpui boruak nuam tak hnuiah mipui hmaa chet vel ka chak tawh tak zet a ni. Sulhnu tam tak ka lo hnutchhiah ve tawh a, FIFA World Cup meuha inlan erawh a danglam dawn hle a ni. Football fan 80,000 vel hmaa inlan hun hi ka nghakhlel tawh takzet a, naupang te ka nih laia ka suangtuhna kha a tak ram a chang dawn ta a ni" tiin a phur thu a sawi.

Russian soprano Aida Gari­fullina chuan Robbie Williams hi a zaipui dawn a, hei hi mipui hmuh chak ber pakhat a ni. Aida Garifullina leh Williams ten stage an mawi tur hi en a chakawm tawh a, hmaih phal chi rual a ni lo.

King of Opera
'King of Opera' an tih mai Opera singer Placido Domingo chu opening ceremony-ah hian a perfom dawn bawk a, mipui mit fukna tur ber pakhat a ni. Kum 77 mi Spanish tenor lar Domingo hi World Cup opening ceremony-a perform thei upa ber a ni hial maithei.

Ani bakah hian Juan Diego Florez chu Luzhniki Stadium laili chang tur zingah a tel bawk dawn a ni.

A behbawm
Opening ceremony-ah hian mi chi hrang hrang an fuan­khawm dawn a, zaithiam aṭanga gymnast thlengin an kim dawn! Dancer, gymnast leh trampolinist 500 vel zet an inlan dawn a, mit leh beng a tlai dawn tih hai rual a ni lo. Music leh thil chi hrang hrang hmangin a thlengtu Russia culture pholan a ni ang.

FIFA lam chuan kuminah hian kum danga la tih ngai loh thil thar an ruahman a, music hmanga inpum khatna lam a tam thei ang ber tarlan an tum dawn.

Official World Cup song 'Live It Up' satu - Will Smith, Nicky Jam leh Kosovar Albanian singer Era Istrefi ten chu an perform dawn leh dawn loh a chiang lo thung.

World Cup-a an ram vawi hnih lo champion pui tawhtu Brazilian international Ronaldo chu chawmawina hlan a ni dawn niin media-te chuan an tarlang bawk.