Chawimawina hla nen

Kumin World Cup-ah hian ram hrang hrangin an player te auh phurhna tur hla ṭha tak tak an nei hlawm a, Argentina, Brazil, Mexico, Spain, Panama, Portugal te chu a nei langsar an ni. Spain phei chuan an ram team captain Sergio Ramos chu chawimawina hla sa tur hian an thehchhuak hial a ni.

Argentiana chuan an player te auh phurna turin hla ṭha tak 'Yo Te Amo Argentina' an nei a, artist hrang hrangin an sa. Kum 2014 World Cup pawh khan hla ṭha tak an lo nei tawh a, kuminah pawh Messi leh a khelhpuite auh phurna tur an nei leh ta. Brazil anthem chu 'Bota Fé' a ni a, Brazilian singer lar Iza leh Daniela Mercury ten an sa a ni.

Colombia lam chuan Sebastián Yatra leh Gianluca Vacchian te sak 'Love' tih chu an hmang mauh mai. Mexico pawhin hnehna chan ngei an tum tih a lang a, an anthem pawh 'El Gladiador Mexicano: Vamos México' tih a ni riap mai.

Sergio Ramos leh Demarco Flamenco te sak 'Otra Estrella en Tu Corazón' (Another Star in Your Heart) tih chu Spain fan te au hla tur a ni leh dawn bawk. Portuguese Football Federation pawhin Cristiano Ronaldo leh a hote khel lai auh phur nan 'Follow Your Dream' an tichhuak ve bawk.