7th Annual Ṭhazual Award ; Zaninah Gospel award sem a ni dawn ta

Zonet Ṭhazual Award vawi sarihna chu zanin hian Dawrpui Multipurpose Hall-ah sem a ni dawn ta. Zanin bikah hian Gospel huangchhunga chawimawina hrang hrang sem a ni dawn a, mit leh beng titlai tak tak thlira ngaihthlak tur a awm dawn bawk.

Ṭhazual Award 2021 hi Zonet Zawlbuk leh Zonet YouTube channel lamah zanin dar 8-ah hian live-a pek chhuah a ni ang.

Gospel huangchhungah hian category pasarih- Best New Artist, Best Group Duo Gospel, Song of the Year, Best Songwriter Gospel, Best Female Artist Gospel, Best Male Artist leh Best Music Video Gospel-te an sem dawn a, heng bakah hian Gospel leh Lengzem-in category inpawlh an neih Band of the Year puan a ni nghal bawk dawn.

Pathian fakna hla mawi tak tak ngaihthlak tur a awm dawn
Award sem zan khatnaah hian Gospel huang chhunga zaithiam ṭha tak takin fakna hla mawi tak tak an sa dawn a, Award sem zan mah ni se Pathian fakna hun ṭha tak a nih ngei a rinawm.

Angaihteii, Mami Hnamte, Remruata, Jerry & Benjamin, Arini, Cindy, Bee31, Melody, Andrew K Lalchhandama, Thawhlehnaniropuia leh One in Christ-te chu zanina inlan turte an ni a, mit leh beng a tlai dawn tih a chiang.

Jerry & Benjamin hian tunhnaia an hla thar tihchhuah hit mai 'Mak tak leh hlauhawm taka duan' chu an rawn thlawh chhuahpui ngei a rinawm a, he hla hi Song of the Year award dawng thei zinga tel ni bawkin live-a an sa tur hi thlira ngaihthlak a chakawm tawh viau mai.

Zaithiam dangte erawh an hla sak tur tak rin lawk thiam a harsa a, mah se kalkhawmte pawhin an ṭhuthmun aṭanga an lo zawm ve theih tur, kan hla hriat lar sa tak tak an sa ang tih a rinawm.

Musician an ṭha leh dawn a, Ṭhazual Award leh Mizo Idol-a musician-te bakah part lo petute bawkin kan zaithiamte an pui leh dawn. Tute nge an nih sawi nawn a ngai tawh loa, an combination a ṭhain an rimawi play pawh a 'solid' ṭha ṭhin tih leh part lo petute pawhin an thiam tih chu kan hriat tlan tawh kha.

Zanina category ngaihnawm tura rin
Best New Artist-ah hian hmeichhe pali leh mipa pakhat nominee an ni a, he category-a award la tur hian kumdangah pawh ngaihven a hlawh ṭhin a, kuminah pawh tuin nge dawng dawn hriat a chakawm tawh viau.

Best Male Artist leh Best Female artist tur hriat an chakawm tawh a, a bikin hmeichhe lam buk rih zawng a intluk tlang a, tuin nge he award hi hum haw dawn tih chu zanin hian kan hre tawh dawn a ni.

Gospel leh Lengzem-in category inṭawm an neih chhun a nihna angin Band of the Year pawh hi hriat a chakawm tawh viau.

Nikum lamah hrileng vangin a hmunah chhimtu awm loin award semna ceremony buatsaih a ni a, kuminah erawh sorkar SOP zawm chungin a hmunah chhimtu an awm tawh thung dawn a ni.