Ed Sheeran '=' Billboard 200 chart No.1
Billboard 200 chart-ah roreltu thar an awm a, chu chu tudang ni loin Ed Sheeran a ni a, a album thar ber '=' chu chart-ah pakhatna a nihpui.
Chart topper album pali nei thei Ed Sheeran
Ed Sheeran chuan a studio album pangana '=' chu Billboard 200 chart-ah pakhatna a nihpui a, heti hian Sheeran hian a album tihchhuah pali lai chu Billboard 200 chart a la nihpui vek a ni.
'Equals' hian kar hmasa chhung khan US-ah equivalent album units 118,000 a hmu chhuak niin MRC Data chuan a tarlang a, heta a zahve vel zet hi chu album a hralhna aṭanga a hmuh chhuah niin, Album sales chart-ah pawh pakhatna a ni nghe nghe.
He album hi US mai ni lo Australia, Belgium, Canada, Denmark, France, Germany, Ireland, Italy, Lithuania, Netherlands, New Zealand, Scotland, Sweden, leh United Kingdom-ahte pawh pakhatna a ni vek.
Hla 14 awmna album hi US-ah ringawt kar hmasa chhung khan copy 68,000 a hralh thei a ni.
Kar hmasa lama pakhatna Drake 'Certified Lover Boy' chu pahnihna ni thungin Morgan Wallen 'Dangerous: The Double Album' chu pathumna a ni ve bawk.
Doja Cat 'Planet Her' chu palina niin Megan Thee Stallion chuan a album thar 'Something For Thee Hotties: From Thee Archives' hmangin top 5 a khar a ni.
Hot 100 chart-ah Adele bawkin ro a la rel
Adele-i'n a album thar tur '30'-a a single a tihchhuah hmasak ber 'Easy On Me' Billboard Hot 100 chart-ah pakhatna ni lehin a zawin kar thum chhung pakhatna a ni tawh.
Bristish singer Adele hian he album hi Hot 100 chart-ah kar li chhung zet a lanpui tawh a, chuta a hun tam ber chu chart chung berah a hmang ta a ni.
Single chart lamah hi chuan thil danglam a thleng tam lo a, kar hmasaa pahnihna The Kid LAROI & Justin Bieber 'Stay' bawk pahnihna niin lehin pathumna pawh Lil Nas X & Jack Harlow 'Industry Baby' bawk a ni leh.
Artist 100-ah Sheeran tho
Artist 100 chart lamah pawh Ed Sheeran chuan ro a rel a, kar hmasa lam khan palina ni mah se kar hmasa chhung khan US lamah a album a chet ṭhatpui bawk a, Artist 100 chart-ah pakhatna a ni ta a ni. Drake chu pahnihna a ni a, kar hmasa lama pakhatna Adele chu pathumna a ni thung.