7th Annual Ṭhazual Award ; Lengzem huangah tu nge langsar dawn?

Zonet Ṭhazual Award 2021 zan hnihna, Lengzem zan chu zanin dar 8-ah hian Dawrpui Multipurpose Hall-ah bawk sem a ni leh dawn a, Lengzem huang chhunga category pariatah award hi sem a ni dawn a, Rini Hlondo chuan zanin award sem inkhawm hi a 'host' dawn.

Lengzem huangchhuangah hian JT Production chu nomination hmu tam ber a ni a, pali lai a hmu. Kimkima leh Manuna-te chu categoary pathum laiah an hming a lang a, award pakhat aia tam dawng thei zingah Jaui, Feli Fanai, Benjamin Sum, Zaii Hauchhum leh Siampuii Ralte-te chu an tel bawk.

MDM Lengzem artist-te hi an ṭha hlawm a, category tin mai hi a ngaihnawm vek dawn tih a chiang.

Lengzem zan a 'hot' dawn
Zaninah hian tunlaia a zai Zofate'n an ngainat em em Siampuii Ralte a zai dawn a, hla hlui mawi taka rawn thar thawh ṭhintu R. Lalruatkima a inlan dawn bawk.

Tunlaia sawm hlawh em em mai Benjamin Sum zai ngaihthlak tur a awm dawn a, 'Kan Khua' hitmaker Rebecca Lallawmsangi pawhin mit leh beng a titlai dawn tih chiang reng mai. Chumai a la ni lo, Mizo band ṭha ber zinga mi Shai Hills an zai dawn. Jt Production pawhin a hla lungkuai tak tak hmangin min awi dawn a, Zaii Hauchhum leh Lateii-te pawh inlan tur zingah an tel.

Fam ta Rdi pualin Gnie leh Jaui inlan tur a nghahhlehawm. Chubakah Mathlenga leh Jenny Jathang-te pawh zai tur zingah an la awm cheu. Mit leh beng a tlai dawn.

Best New Artist tur hriat a chakawm tawh
Siampuii Ralte, Shin Bia leh R. Lalruatkima-te inelna tur category-ah hian tuin nge award dawng dawn tih hriat a chakawm tawh. Anni pathum hi i lo la hre lo a nih chuan, YouTube-ah an hla tihchhuah tawhte'n thlirtu engzat nge a neih han en mah teh. Best New Artist huanga an awm hi mak iti hial zawk mai thei. An larna a la rei lo ngaihtuahin mipui thinlungah an tla na viau tih i hre thei ang.

Anni pathum bakah hian tun hnaia rawn invawrh chho mek, 'Ṭhian Ngaihnawm' tih hla satu Lalduhawmi leh music thiam tak, 'Hmeichhia' tih hla satu Apuii Chhangte-te pawh an la awm. He category hian kumdang aiin ngaihven a hlawh a nih pawhin a mak lo.