2021 CMA Awards ; Chris Stapleton a báwr haw

55th Annual Country Music Association Awards (CMA) chu Nilaini khan Bridgestone Arena, Nashville, Tennessee-ah semin Luke Bryan chuan a 'host' a, Chris Stapleton chu award dawng hnem ber niin award pali a dawng.

Award sem ceremony hi kum 18 chhung zet chu mi pakhat chiahin an host tawh loa, kuminah erawh Luke Bryan hian amahin a host a ni. September 9 khan nominee puan chhuahna neih niin Eric Church leh Chris Stapleton-te chu nomination hmu tam ber an ni a, panga ve ve an hmu a ni.

Chris Stapleton tana zan ṭha
Nomination hmu tam ber Chris Stapleton chuan award pali lai a dawng a, nomination panga a hmuhna zingah pakhatah chiah award a dawng lo.

Album of the Year, Male Vocalist of the Year, Single of the Year bakah Song of the Year category-ahte award hi a dawng a, nominee a nihnaah chuan Entertainer of the Year award chiah a dawng lo a ni.

Award dawngtu langsar dangte chu
Award ngaihhlut Entertainer of the Year award chu Luke Combs-in a dawng a, Female Vocalist of the Year award chu Carly Pearce-in a dawng thung. Old Dominion chu Vocal Group of the Year award dawngtu an ni a, Brothers Osborne chuan Vocal Duo of the Year award a dawng bawk.

New Artist of the Year award chu Jimmie Allen-in a dawng a ni.

CMA Awards vawi 55-naah hian zaithiam eng emaw zat an inlan a, chung zingah chuan Miranda Lambert, Eric Church, Zan Brown Band, Blake Shelton, Keith Urban, Thomas Rhett leh Dan + Shay-te pawh an tel.