Lady Antebellum band hming thar Lady A
US pop group Lady Antebellum chuan an band hming chu 'Lady A' tiin an thlak a, 'Antebellum' tih thumal hi sal neih hunlai nena inzawm a nih avangin an thlak a ni.
Nashville trio-te hian Lady Antebellum hming hian Grammy panga lai an la tawh a, US top 10 album pawh pasarih lai an nei tawh bawk. Hetiang khawp hian an band hming hi thang tawh mah se 'antebellum' hi Civil War hmaa US chhim lam hun leh an architecture lam sawina a ni miau a, chumi vang chuan an pu zui duh ta lo.
Twitter-ah hemi chungchang hi tarlangin 'antebellum' hi 'architectural style' vanga la an nih thu leh an band hmingin mi rilru a tihnat tawhna zawng zawngah ngaihdam an dil zui bawk. Social media lama an page hming pawh 'Lady A' tihin an thlak vek tawh.
Thuchhuah an siamah hian an mit chu tihmena a awm thu an tarlang a, mihangte'na en hranna leh dik lo taka rorelna an tawk ṭhin chu pawi an ti hle tih an tarlang.
Kum 14 vel liam taah khan an band thlalak hmasa ber chu 'antebellum style' in kawtah an la a, hemi hnu hian Lady Antebellum hming hi an pu zui ta a ni.
"Kum 14 dawn liam taah khan kan chhuak ho a, southern 'Antebellum' style in kawtah a hmasa ber atana kan thlalak chu kan la ho a, chumi hmingchawi chuan kan band hming hi kan phuah a ni. Musician kan nihna angin, min hnehtu chhim lam music- Southern rock, Blues, R&B, Gospel leh Country min hriat chhuah tir a ni. Mahse Civil War hmalam hun, sal neih hunlai sawina atana hman ṭhin thu a ni tih kan hriatin pawi ka ti a, kan inchhir bawk. Chumi avanga rilru natna kan thlen zawng zawng lakah pawi kan ti tak zet a ni. Midang tihnat kha kan rilruin a tum a ni lo a, mahse chu chuan kan tihnat tawhte kha a thlak danglam chuang si lo. Chumi avang chuan vawiin hian kan ṭawng chhuak a, danglamna kan thlen ta a ni."
- Lady A
Lady A(Lady Antebellum) hi kum 2006 khan Nashville, Tennessee-ah an indin a, member pathum niin Hillary Scott, Charles Keeley leh Dave Haywood-te an ni. Studio album pasarih tichhuak tawhin nikum khan an album thar ber Ocean chu an tlangzarh. Hla hit an ngah tawh hle a, "Need You Now" vang khan Grammy Award pawh pali lai an dawng.