7th Annual Ṭhazual Award Gospel ; Maruati'n kum thum chhung a zawnin Best Female Artist Award a dawng ta

Zonet Ṭhazual Award 2021 Gospel chu Ningani zanah khan sem a ni a, Zonuni Pachuau chuan hneh taka host-in nomination hmu tam ber H Lalremruati (Maruati) chuan award pahnih a dawng a, Jerry & Benjamin Colney-te chuan an hla hit 'Mak tak leh hlauhawm taka duan' hmangin award pahnih an dawng ve bawk.

Best Female Artist Gospel 'hattrick' siamtu Maruati
Nomination pali lai hmutu Maruati chuan Ṭhazual Award 2021 Best Female Artist Gospel award a dawng leh a, he award hi kum thum chhung a zawnin a dawng ta a, tunhnai kum thum kum li chhung vela a performace enin a phu pawh a phu hle.

Best Female Artist Gospel category hi Ṭhazual category-ah pawh category hot ber a ni awm e. Hlimhlimi, Arini, Cindy leh Stacy Punte te awmna huang hi a nep thei loa, chung zaithiam ṭha tak tak zingah chuan Maruati hian award hi a hum haw ta a ni.

Maruati'n Lalnunpuia Hrahsel hla phuah thiam tak leh nung taka a sak 'A nung ka hria' chu Song of the Year Gospel atan thlan a ni bawk.

'Mak tak leh hlauhawm taka duan' a 'hit'

Mizo Idol star Jerry leh Benjamin Colney thawkdunin an tihchhuah 'Mak tak leh hlauhawm taka duan' chu YouTube ang bawkin Ṭhazual award lamah pawh a hit. He hla hmang hian ropui takin show an hawng a, tin, Best Group/Duo Gospel leh Best Music Video Gospel chu he hla vang hian a satute leh music video siamtute'n an dawng bawk.

Award dawngtu dang
HC Lalramchhani chuan Best New Artist Gospel award a dawng a, Best Songwriter Gospel chu Arini'n mawi taka a sak 'A nung ka hria' phuahtu Fela chuan a dawng. Best Male Artist Gospel chu Amtea'n a dawng a, Band of the Year award chu The Prophets-in an dawng bawk a ni.

Performance lam
Ṭhazual Award vawi sarihna zan khatna chu Benjamin Colney-in a hla hit 'Pen chhuak ang' hmangin show a hawng a, thawm a ṭha nghal viau. Jerry rawn langin 'Mak tak leh hlauhawm taka duan' in an chhunzawm. Show hawnna aṭangin programme a puak nghal ṭhak a ni ber mai.

Performance zawng zawng a ṭha vek a ni ber mai. Artist inlan te an inbuatsaihna a ṭha tih a hriat. Thawhlehnaniropuia'n Ngurthangvela hla 'Hmangaih ram nuam' a rawn thlawh fuh viau. Cindy'i'n live-ah a zai thiam tawk tih a lantir leh a, Remruata chuan Mizo rilrem zawng tak hmangin kalkhawmte a awi bawk.

Andrew leh Bee31 sawi hmaih chi an ni lo. An che ṭha. One in Christ leh Mami Hnamte-te zai a nung ṭha a, fakna hla ṭha tak leh mawi tak an hlan. Sawi hmaih theih miah loh chu Arini zai kha a ni awm e, 'A nung ka hria' a rawn sa a, a sa mawi tak zet. Studio recording aia ṭhain a zai emaw tihmai tur a ni!

Angaihtei a zai ṭha a, Melody-i'n a zai nung tak hmangin show a khar a, a hmuna chhimtu lam phei chu an ṭhu hle hle thei tawh loa, Melody zai hi an lo zawm ṭha hle nghe nghe.

Programme a felfai
Ṭhazual award zan khatna programme a felfai viau. Inpuahchahna a ṭha tih hmuh hmaih theih a ni lo. Host a zei bawk a, programme a boring lo.

Award sem zan a nih angin award presenter, award dawngtu, performer-te leh host bakin stage an luah meuh lo. Ṭul loa thusawi rei tak ngaihthlak tur awm lote kha hmasawnna a ni.