7th Annual Ṭhazual Award ; Siampuii Ralte-in award pahnih a pawm haw

Ṭhazual Award 2021 Lengzem chu Zirtawpni zanah khan sem a ni a, kumin Ṭhazual award latute a hriat kim ta. Lengzem award sem zanah Siampuii Ralte a langsar a, award pahnih pawm haw thei awmchhun a ni.

Siampuii Ralte chet ṭhat zan
Sihphir tleirawl Siampuii Ralte chuan Best New Artist Lengzem award a dawn bakah JT Production nena an thawhdunna hla 'Ka hmangaih te' avangin Best Group/Duo Lengzem award a dawng bawk. Nominee a nihna category pahnihah award a dawng ve ve a ni. Thiam takin a hla mawi tak 'Lunglawm tikimitu' a sa bawk.

Category rin lawk thiam har tak Best Female Artist Lengzem award chu Zaii Hauchhum-in a dawng a, Benjamin Sum chuan Best Male Artist Lengzem award a dawng bawk.

Lengzem zan a 'hot'

Rini Hlondo-in zei taka a kaihhruaina hnuaiah Lengzem award sem a ni a, show hmuhnawm tak leh beng titlai tak a ni.

A hmunah kal thei tlem mah se in lam leh internet kaltlanga lo entu an tam tih a hriat a, YouTube lamah pawh thlirtu 15.9k chuangte an awm hial. JT Prodcution-a'n lungkuai takin show a hawng a, peformer zawng zawng an che ṭha a tih theih awm e. Shai Hills chuan an hla hit 'Nghilh a har' hmangin kumin Ṭhazual award sem ceremony an khar.

'Kan khua' sawi lawk ang, 10 million views!
Peka Fanai hla phuah, Rebecca Lallawmsangi'n a sak 'Kan khua' chu Song of the Year-ah thlan a ni. Rebecca-i hian he hla hi Ṭhazual award sem zanah a sa bawk a, a hmuna kalte a ṭhap ṭha viau.

He hla hian tunah hian YouTube lamah thlirtu maktaduai 10 chuang fe a nei tawh. Tun thlasik chhoah thlirtu nasa taka an pun a la rinawm bawk. 'Kan khua' hi Mizo hla, YouTube-a 10 million views nei hmasa ber a ni a, Song of the Year award a dawng hi phu ti lo an awmin a rinawm loh.

Sawi hmaih thiang lo mi pawimawhte chu...
Zonet Ṭhazual award sem ceremony hian hma a sawn telh telh tih hmuh hmaih theih a ni lo.

Award ceremony pui tham leh show ropui Zofate tana min chhawp chhuah saktu Zonet-in fak an phu. Show an buatsaihna atana an sum sen a tam a, sponsorship an hmuhin nasa takin a phuhru zo lo. Chutichung chuan Zofate tan show ṭha tak min chhawp chhuahsak thei.

Musician leh backing vocals-te sawi hmaih theih an ni lo. Award sem zana backing vocals pahnih- Aengi leh Rosalyn zai khan ngaihven a hlawh. An zai thiam bawk a, YouTube comment lamah pawh an fak viau.

Zonet director LV Lalthantluanga chuan,"Bruce-a hi musician leh backing vocals convener a ni deuh tawp mai, a hmalakna a fakawm," tiin Vanglaini a hrilh a, Aengi leh Rosalyn a zawn chhuah dan chungchang zawhna chhangin Bruce-a chuan,"Event lian lutuk loah an zai ka hmu ṭhin a, an thiam ka ti hle a. Warehouse Cafe vel aṭangin kan inhre ṭan a, kum 2018 Ṭhazual award sem dawn khan ka sawm ta a ni," tiin a sawi bawk.