Ramri venga duty nunna chan ta Carolyn H. Lalvenmawii
Sangau khaw nula rami venga duty zinga mi, kum 18 mi Carolyn H. Lalvenmawii chu June 9 (Thawhlehni) khan a boral a, June 10 khan vui liam a ni.
Covid-19 hri leng vangin ramdang mi Mizorama an lo luh lohna turin ramri depa awm khuate chu an duty ṭhin a, Sangau khua pawh Fungsihchhuah (Saisihchhuah)-ah an in-duty chhawk ṭhin. Sangau-I branch YLA secretary sawmna angin a ṭhian dangte nen Carolyn H. Lalvenmawii pawh hi ramria duty-te ei rawngbawlsak tur leh ṭangkaina ang anga hna thawk ve turin a kal a, May 4-11 inkar khan ramri-ah hian a duty ve a ni.
Ramri venga an duty lai aṭang hian a insawisel ṭan a, a thil ei a tui loh avang leh insawiselna neuh neuh a neih avangin Sangau lamah hruai haw a ni a, a thisen test a nih hnu chuan Malaria PV a vei a ni tih hriat chhuah a ni ta tih Sangau-I branch YLA secretary K. Lalfaksanga chuan Vanglaini a hrilh.
Sangau damdawi-ina hun eng emaw chen enkawl a nih hnuah a dinhmun a ṭhat deuh avangin in lama inenkawl zui turin damdawi-in a chhuahsan a, mahse thinlian a nei tel tih hriat chhuah a nih leh tak avangin June 8 khan Sangau PHC-ah dah luh leh niin, June 9 khan Sangau damdawi-inah hian a boral ta a ni.
Nilaini khan a chenna inah ropui takin vuina hun hmanpui a ni a, Sangau-I thlanmual-ah vui liam niin mibikte tana siam ṭhin Thlanpui buatsaihsak a nih bakah ṭhalaite'n silaite tlirin an thlah liam a ni.
Central YLA hruaitute pawh Carolyn H. Lalvenmawii vuina hmang tur hian Sangau lamah hian an kal a, Lawngtlai district huam chhunga YLA branch hrang hrangte chuan YLA flag a ngul chanveah Lalvenmawii sunna atan hian an zar bawk.
Râl duh tan
Sangau YLA Sub Headquarters chuan Mizoram hmun hrang hrang aṭanga he nula ral duh an awm thu an hriatin an ral theih dan tur remchang an siam. Be pawp duh tan YLA Sub Headquarters hruaitute LC Rosangliana, Treasurer - 7085198570 leh LZ Ringlawt, Asst Secy - 9862835431 biak theih an ni a; a hnuaia bank account-ah hian ralna pek theih a ni:
Account No : 97005812076
Account Holder : YLA SUB-HQRS SANGAU
Bank : Mizoram Rural Bank, Sangau Branch
IFSC Code : SBIN0RRMIGB