Mystical Mizoram Ṭhazual Gospel ; Best Male Artist Amtea Pakhatna ni turin a zaithiam 'Tâwk'
Mystical Mizoram Ṭhazual Gospel-ah Amtea 'I tawk' chu pakhatna a ni a, Christina Vanlalnghaki 'Thlan loh khawvel' chu pahnihna niin Benjamin Colney ft Jerry 'Mak tak leh hlauhawm taka duan' chu pathumna a ni thung.
Ṭhazual award fever a la reh lo, Amtea bawk a langsar
Kar hmasaa sem zawh tak Zonet Ṭhazual Award-a Best Male Artist Gospel latu Amtea chu an hla 'I tawk' hmangin chart-ah ro a rel.
Amtea hi chart hmasa lamah khan palina a ni a, tunah erawh nasa taka hma rawn sawnin pakhatnaah a rawn invawrh a ni.
He hla hi thla hnih vel liam taa a tihchhuah kha niin ama phuah a ni nghe nghe a, Amtea hian he hla hi a naupan lai aṭanga miin label an pek zawng zawng, a nun tihhrehawm ṭhinte a tarlanna hla a nih thu sawiin, "Kan nihna dik tak 'Krista fa' kan nihna kan hriat chuan hlima nuih mai a tawk a ni tih puanchhuahna hla a ni," tiin he hla chungchang hi Vanglaini a lo hrilh tawh. Best Male Artist award a lak zawh chiah karah chart lamah pawh Amtea hian ro a rel zui nghal a ni.
Christina-i pahnihna, pathumna Benjamin & Jerry
Christina Vanlalnghaki'n thiam taka a sak, Lalzuimawii Tlau hla phuah 'Thlan loh khawvel' chu pahnihna a ni. Christina-i hian he hla hi thla khat liam ta vela a tihchhuah chauh kha a ni a, YouTube lamah thlirtu nuai chuang an awm der tawh. Pakhatna ni tur pawhin a dinhmun a ṭha sawt viau.
Pahnihna chu Ṭhazual award-a Best Group/Duo leh Best music video award dawngtu Benjamin Colney & Jerry Elaro 'Mak tak leh hlauhawm taka duan' chu parukna aṭangin pathumnaah a rawn inhlangkai bawk a, he hla pawh hi chart topper a ni thuai dawn tih a chiang.
Chart-a lang dangte chu
Mizoram chhunga zai lama award hrang hrang hui kim thei Sawmtea Chhangte 'Ka tan i hlu' chu palina a ni a, Lalbiaktluanga (B Tea) 'Ngaiteh Lalpa' chu pangana a ni bawk.
Chart-a lang an ṭha hlawm hle a, Stacy Punte 'Lalpa fakin' chu parukna a ni a, Mami Hnamte, Hlimhlimi, Hlutei & Biakniin leh Thawhlehnaniropuia-te pawh chart top 10-ah an lang a ni.