‘Predator’ prequel ‘Prey’ nakkum nipuiah

Predator franchise film thar tur 'Prey' chu nakkum nipuiah hian Hulu-a en theih turin tlangzarh a ni dawn.

'Prey' hi kum 300 vel liam taa Comanche Nation-a thil thleng anga chan a ni dawn. Raldo mi Naru, alien Predator laka an tribe huaisen taka chhanchhuaktu chanchin a ni dawn a, Naru lemah hian Amber Midthunder chu a chang dawn a ni.

He film hi '10 Cloverfield Lane' director Dan Trachtenberg chuan a direct dawn a, kum khat vel liam ta aṭang khan he project hi a buaipui ṭan tawh a ni. US-ah chuan Hulu streaming platform kaltlangin 'Prey' hi an tichhuak dawn a, ram dangah chuan Disney+ leh an thawhpui streaming platform-ahte en theihin a awm dawn thung.

Nakkuma tihchhuah tur Predator film 'Prey' hi Predator franchise film pangana tur a ni tawh a, kum 1987-a Arnold Schwarzenegger-a channa 'Predator' tihchhuah a nih aṭanga film pangana tur chiah a ni. Kha film hnuah khan Predator 2 (1990), Predators (2010) leh The Predator (2018)-te tihchhuah ni tawhin Alien vs. Predator film pahnih siam a ni tawh bawk.

Kum 2018-a tihchhuah 'The Predator' kha a che ṭha lo hle a, box office lama a chet ṭhat loh bakah film review-tu lamin an sawisel nasa angreng a, tuna an tihchhuah thar leh turah hi chuan beisei a sang hle ang.