BTS leh Ed Sheeran an che ṭha

2021 MTV EMA chu Pathianni zanah khan Papp László Budapest Sportaréna, Budapest, Hungary-ah sem a ni a, BTS leh Ed Sheeran-te chu award dawngtu langsar niin BTS hian award pali an dawng a, Ed Sheeran hian award pahnih a dawng thung.

BTS leh Ed Sheeran-te award dawn chu
Bangtan Boys hian nominee an nihna zawng zawngah award hi an dawng vek bakah group ang leh K-pop act-a nomination hmu tam ber an ni hrim hrim.

Best Group, Best Pop, Best K-Pop leh Biggest Fans category-ahte award dawngin kumin MTV EMA-ah hian an bawr haw ber a, anni aia award dawng tam an awm lo.

BTS tih lohah chuan Ed Sheeran a che ṭha ber a, a hla hit 'Bad Habits' hmanga Best Song a dawn bakah award ngaihhlut Best Artist award a dawng bawk. Sheeran hian 'Overpass Graffiti' leh 'Shivers' hmangin 2021 MTV EMA award show hi a hawng bawk a ni.

Nomination hmu tam ber a hnawng
Kumin MTV EMA-ah hian nomination hmu tam ber Justin Bieber chu kut ruakin a haw. Category pariat laiah nominee ni mah se eng award mah a la lo a ni.

Hetihlai hian nomination hmu tam ber dawttu Lil Nas X leh Doja Cat-te chuan award pakhat ve ve an dawng. Anni pahnih hi category panga ve veah nominee an ni a, award pakhat ve ve an dawng thung.

Award dawngtu langsar dangte
Best New artist-ah award ceremony host, American rapper Saweetie chu thlan a ni a, David Guetta chuan Best Electronic award a dawng. Tunlaia band thawm thawm nei ring tak, Eurovision winner Måneskin chuan Best Rock award an dawng a, anni hi award sem zanah hian an perform bawk.

Nicki Minaj chu Best Hip-Hop dawngtu a ni a, Olivia Rodrigo chuan Best Push dawngin Billie Eilish pawhin 'Your Power' hmangin Video for Good award a dawng ve bawk.