'Eternals'-in ro a la rel zel e

Box Office-ah kar hmasa lama roreltu 'Eternals' bawkin ro a rel leh a, film thar 'Clifford the Big Red Dog' chu pahnihna a ni thung.

'Eternals' sum lakluh a tam tawh
Kar tawp liam ta chhung khan Eternals hian North America-a cinema hall 4,090 aṭangin $26,850,128 lai sum a lalut leh a, kar hmasa lam nena khaikhinin a sum lakluh tlahniam ve nasa deuh tawh mah se North America Box Office aṭanga a sum lakluh tawh zat belhkhawm chu $118,115,383 a tling tawh. Kar hmasa lamah khan $71,297,219 lai a laut a ni.

'Eternals' hian North America pawn lamah $162,600,000 lalut tawh bawkin a sum lakluh tawh zawng zawng chu $280,715,383 a tling tawh.

Chloé Zhao film siam 'Eternals' hi $mtd 200 vel senga an siam a ni a, Gemma Chan, Richard Madden, Kumail Nanjiani, Lia McHugh, Brian Tyree Henry, Lauren Ridloff, Barry Keoghan, Don Lee, Harish Patel, Kit Harington, Salma Hayek, leh Angelina Jolie-te an chang a ni.

Pahnihna 'Clifford the Big Red Dog'
Adventure comedy film, Walt Becker-a direct 'Clifford the Big Red Dog' chu kar hmasa Nilaini khan US-ah tlangzarh a ni a, tun kar tawp liam ta chhung khan theatre 3,700 aṭangin $16,627,491 a lalut a, sum lalut tam ber dawttu a ni.

He film chungchangah hian film review-tute ngaihdan a inang lo a, Rotten Tomatoes lamah chuan mi 57-in review-in rating 5.10/10 a hmu.

Top 5 leh film thar te
'Dune' chu pathumna a ni thung a, 'No Time to Die' chu palina niin 'Venom: Let There Be Carnage' chu pangana a ni.

Pasarihna 'Belfast' chu film thar a ni a, 19-na 'Julia' leh 23-na 'What Do We See When We Look at the Skyṭ' chu film thar Box Office Mojo chart-a lang a ni bawk.