Spotify record siamtu Taylor Swift ; Swift vangin John Mayer an la hua!

Taylor Swift chuan a album thar 'Red (Taylor's Version)' hmangin Spotify streaming record a siam a, hmeichhe album tlangzarh aṭanga darkar 24 chhunga stream-tu tam ber record a siam.

Swift hian Zirtawpni liam ta khan 'Red (Taylor's Version)' hi a tlangzarh a, darkar 24 chhung lekin ram hrang hranga a fan-te chuan he album hi vawi maktaduai 90.8 zet zu han stream hman a!

'Red' singer hian nikum lama 'Folklore' hmanga record a lo siam tawh chu a khum nghe nghe a, 'Folklore' kha darkar 24 chhungin vawi mtd 80.6 an stream hman a ni.

Taylor Swift hi Spotify history-a nikhat thil thua hmeichhe artist zai an stream nasat ber a ni nghal a, Zirtawpni liam ta khan Taylor Swift zai hrim hrim hi vawi mtd 122.9 zet stream a ni bawk.

'Red (Taylor's Version)'-ah hian Taylor Swift chuan 'Red' album-a mi zawng zawng kha record ṭhain a dah leh vek a, hla thar dang pakua lai a belh bawk. Ama direct nei film tawi 'All Too Well' pawh Zirtawpni vek khan a tichhuak a, he film-ah hian Sadie Sink, Dylan O'Brien leh amah Swift-te chu an chang a ni.

Taylor Swift fan-te'n John Mayer an la haw reng!
A ex Taylor Swift-i nen an inṭhen dan chungchangah Swifties-te an la lungawi thei ngang lo a niang. John Mayer chuan Taylor-i'n 'Red (Taylor's Version)' a drop hnuah amah an huatna message a dawn nasat thu a sawi.

Zirtawpni khan IG lamah thu dengkawng tak pakhat a dawn phei chu tarlangin, chutiang lam hawi message chu tunhnaiah a dawn nasat thu a sawi zui bawk.

Mayer hian DM lama a message dawnna nena an inbiakna pawh a tilang a, message thawntu hian a hnuah chuan thupha a chawi leh tho a ni.

Swift leh Mayer hi kum 2009-10 velah khan an inngaizawng ṭhin a, Swift-i hla 'Dear John' pawh kha John Mayer nena an inṭhen vanga a phuah niin an sawi.