World Cup 2018 Opening Ceremony-ah Robbie Williams-a'n lawm a hlawh ; A hnu khar danah sawiselna a tam

Russia khawpui Moscow-a Luzhni­ki Stadium-ah mipui 80,000 chuang an pungkhawm a, 'Greatest Show on Earth' khuhhawnnaa pung­khawmte hi Robbie Williams chuan zaiin a awi. English singer hian lawm a hlawh hle a, mahse a hnu khar danah sawiselna a tawk nasa hle thung!

Robbie Williams hian a hla hit 'Let Me Entertain You' tih hla hmangin bul a ṭan a, kum 2002-a a tihchhuah 'Feel' a sa tel zauh bawk. 'Angels' leh 'Rock DJ' te a sa zui leh a, a tira sak tura sawi 'Party Like a Russian' a sa tel lo thung.

Russian soprano Aida Garifullina chuan Robbie Williams hi zaipuiin, 'Angels' an sa dun a, hmuh an nuam kher mai. Stadium chhunga mipui an sahawk a, an hmel leh chet ziaah an phur tak zet tih a lang. Hetih lai hian camera lama thil lo langin entu mit a la a, opening ceremony zawha sawi zui hlawh ber a ni zui bawk.

Thil thleng chu...
Minute 20 vel chhung hun hman a nih hnuah mipui mit fukna Robbie Williams chuan field a chhuansan dawnin camera hma takah a kutzung lai a tiang a, hei hi a hmun leh tv aṭanga lo thlirtu mi tam tak mak tih chu a ni. Hei hi ṭawngkamah chuan ṭawngkam bawlhhlawh leh anchhia anga ngaih a ni.

Ceremony-a zawh hnua an khel zui nasat ber a ni a, dem pawh a hlawh nasa hle. Hollywood reporter, Fox chuan hemi chungchang hi sawifiahin, "2018 FIFA World Cup opening ceremony-a thil thleng kha a pawi tak zet a ni. Live-a pek chhuah a nih avangin enge thleng dawn kan hre lo a, entu mipuite chungah ngaihdam kan dil e," tiin, pop star Robbie Williams-a chet dan tv-a focus a nih avangin thupha an chawi.

Football fan tam tak chuan Williams chet dan hi an helh hle a, ṭawngkam pawh an duhtui lo hle. Expert-te chuan a chet dan hi inhrem theihna a nih thu an sawi a, Russia administrative code chuan £6,000 thleng chawi tir theih a nih thu an lo sawi ve mek bawk! Robbie Williams hian a perform hma hian mipuite chu peace symbol a hmuh a, a hnu khar dan erawh a dang daih a ni, an ti bawk.

A chheh vel
Russian harpist Alexander Boldachev chu ‘fire bird’ nen field chhungah a lut a, Spain captain hlui kum 37 mi Iker Casillas leh Russian supermodel Natalia Vodianova-te chuan World Cup trophy an pholang bawk. Williams zai laiin Brazi­lian footballer Ronaldo chuan field chhung a rap a, Miss Russia 2003 Victoria Lopyreva pawh hmuh tur a awm bawk.

Opening ceremony-ah hian mi 800 vel an inlan a, dancer, gymnast leh trampolinist 500 vel zet chetlain mit a titlai hle a ni. Music leh lam chi hrang hrang hmangin a thlengtu Russia culture pholan a ni.

Artist rualten Russia leh Saudi Arabia ten Group A match hmasa an khelh hmain show hmuhnawm an lantir bawk.

Beisei phak lo?
'Greatest Show on Earth' a nih miau avangin khawvelin a beisei sang a, chu tih rual chuan opening ceremony erawh beisei a phak lo niin a lang.

Official World Cup song 'Live It Up' satu - Will Smith, Nicky Jam leh Kosovar Albanian singer Era Istrefi te hmel hmuh tur a awm lo.

A tira perform tura tarlan 'King of Opera' an tih mai Opera singer Placido Domingo chu opening ceremony-ah hian a hmel hmuh tur a awm lo a, Juan Diego Florez chu Luzhniki Stadium laili chang tura ngaih ni mahse a inlan lo bawk.