Carters album thar a chhuak

'The Carters' tia an sawi ṭhin Beyonce leh JAY-Z te chuan joint album an siam 'Everything Is Love' tih chu Inrinni zan khan an tichhuak thut a, fan-te an barakhaih hle.

Beyonce leh JAY-Z te hian June 16 zan khan London-ah concert an nei a, mipui pungkhawm hmaah album hi an tlangzarh riap mai a ni. Album thar tlangzarh hun tur hi tarlan a ni lo a, an tichhuah tur pawh hi an sawi lawk lo. Fan te rin loh lam tak thil a thleng a, hla pakua awmna album hi an tlangzarh ta rup a ni.

'Everything Is Love' album-a hla ṭhenkhat hi tihchhuah a lo ni tawh a, album tichhuah rual hian 'Apeshit' single video pawh an tlangzarh zui leh bawk. Music video hi Ricky Saiz chuan a direct a, Louvre, Paris-ah May thla khan shooting an nei a ni. 'Apeshit' hi a hit nghal hle a, YouTube lamah pawh viewer an pungchak hle.

Beyoncé hian On the Run II Tour a nei mek a, Inrinni zan khan London-ah concert-in a pasal JAY-Z hian a ṭawiawm a ni.