Summer Walker 'Still over it' a hit 'over' ; Hot 100 chart-ah Adele 'Easy on me' bawk

Billboard 200 chart-ah Summer Walker album thar 'Still over it' chu pakhatna a ni a, Swedish pop legend ABBA album thar 'Voyage' aiin kar hmasa khan US lamah an ngaithla nasa zawk. Hot 100 chart lamah erawh Adele khum thei an awm rih lo.

Taylor Swift record nihrualtu Summer Walker
Summer Walker chuan November 5 khan a studio album pahnihna 'Still Over It' chu a tlangzarh a, a hit nghal hle.

Kar hmasa chhung khan he album hian equivalent album unit 166,000 a hmu chhuak a, Walker-i Billboard 200 No.1 hit album hmasa ber ani a, kum 2016 hnua R&B album chart topper ni leh thei hmasa ber a ni bawk. Beyoncé 'Lemonade' hnuah khan R&B album hi Billboard 200 chart chung berah a la awm leh loa, Walker hian danglamna thar a rawn thleng leh ta a ni.

'Still Over It' -ah hian hla 20 a awm a, chung zinga hla 18 chu Billboard Hot 100-ah a lang vek. Billboard Hot 100-a an hla 18 a ruala lang thei record hmeichhe zinga siamtu awmchhun chu Taylor Swift a ni a, Walker hian Swift record hi a rawn nihrual chiah a ni.

Billboard Hot 100-a an hla 18 a ruala lang thei record hmeichhe zinga siamtu awmchhun chu Taylor Swift a ni a, Walker hian chu chu a rawn nihrual

Album hralh ṭha ber ABBA
Kar hmasa chhunga US-a album hralh ṭha ber chu Swedish pop group ABBA an ni a, an rawn comeback-na album 'Voyage' chu an Billboard 200 chart lamah pakhatna nihpui zo lo mah se Album hralh kawngah erawh hma an hruai chiang hle.

Billboard album sales chart topper 'Voyage' hi kar hmasa chhung khan US-ah copy 82,000 lai an hralh a, Billboard 200 chart topper 'Still Over It' erawh copy 12,000 chiah hralh a ni thung. Mahse streaming service leh song download sales lamah 'Still Over It' hi nasa taka a san zawk avangin 'Voyage' chu Billboard 200 chart topper a ni phak lo.

ABBA album tharah hian hla 10 a awm a, streaming platform hrang hrangah ngaihthlak theihin a awm tawh.

Hot 100 lamah Adele rorelna an paihthla thei lo
Adele hla thar 'Easy on Me' chu Billboard Hot 100 chart-ah a zawnin kar li chhung pakhatna a ni tawh. Hot 100 lamah hian thil danglam a thleng hlei thei loa, pahnihna pawh kar hmasa lama pahnihna The Kid LAROI & Justin Bieber 'Stay' tho kha ani leh a, he chart-ah hian he hla hi kar 18 chhung a awm tawh a, top 5 aia hniamah a awm hleithei lo.

Pathumna chu Lil Nas X & Jack Harlow 'Industry Baby' bawk kha a ni leh a, Ed Sheeran 'Bad Habits' leh 'Shivers' chu palina leh pangana a ni thung.

Artist 100
Artist 100 chart-ah pawh Summer Walker bawk pakhatna a ni a, ABBA chu pahnihna ni thungin Ed Sheeran chu pathumna a ni ve bawk.