RED Notice, NETFLIX film entu ngah chak ber

Rawson Marshall Thurber action comedy film, $maktaduai 200 lai senga siam 'Red Notice' film chu Netflix film entu pung chak ber a ni nghal.

Dwayne Johnson, Ryan Reynolds leh Gal Gadot-te channa film 'Red Notice' hi November 12 khan Netflix streaming service-a en theih turin an chhawp chhuak a, kar tawp liam ta chhung ringawt khan darkar maktaduai 148.7 zet en hman a ni a, Sama TV-in Thawhṭannia report a tihchhuah aṭanga a lan dan chuan US-a chhungkaw maktaduai 4.2 laiin kar tawpah khan an en hman.

'Red Notice' hi kar tawp vawi khata entu tam ber a ni nghal a, Samba TV hian minute nga tal en chin chu film entuah an chhiar ṭhin. Disney+ movie ho leh HBO Max-a tihchhuah tawh film zawng zawngah pawh 'Red Notice'-in kartawp vawi khata entu a neih zat ang nei thei film hi a la awm ngai lo niin Deadline chuan a tarlang.

Director Rawson Marshall Thurber leh Johnson thawhdunna film reng reng hi a 'hit' viau zel. Central Intelligence leh Skyscraper-ahte khan an lo thawkdun tawh a ni. Gadot leh Johnson hi Fast 5 leh fast 6-ah an thawk dun tawh a, Ryan Reynolds leh Johnson pawh hi Hobbs & Shaw-ah khan an lo thawkdun zuai tawh bawk.