Hogwarts wizard trio an inlan ho leh dawn

Harry Potter fan-te lo inring ru le! Harry Potter film-a a changtu pathum- Daniel Radcliffe, Rupert Grint leh Emma Watson-te chu an thawkho leh dawn, an film chanho hmasak ber 'Harry Potter and the Sorcerer’s Stone' tlin lawmna pualin HBO Max lamah an inlan ho dawn.

Nakkum kum thar ni tak, January 1 hian 'Harry Potter 20th Anniversary: Return to Hogwarts' chu HBO Max-ah tihchhuah a ni dawn a, hetah hian Hogwarts wizard trio-te hi kan hmu leh dawn a, anni bakah hian Harry Potter film pariata inlan hrang hrangte pawh an inlan leh dawn a ni.

'Harry Potter and the Sorcerer’s Stone' kum 20 tlin lawmna puala an tihchhuah tur 'Harry Potter 20th Anniversary: Return to Hogwarts'-ah hian interview leh achangtute inkawm khawmnate hmuh tur a awm dawn niin HBO Max lam chuan an tarlang.

'Fantastic Beasts: The Secrets of Dumbledore' tihchhuah hmain WarnerMedia TBS leh Cartoon Network lamah pawh he special reunion show hi an pe chhuak dawn bawk.

Harry Potter star pathum bakah hian Helena Bonham Carter, Robbie Coltrane, Ralph Fiennes, Jason Isaacs, Gary Oldman, Imelda Staunton, Tom Felton, James Phelps, Oliver Phelps, Mark Williams, Bonnie Wright, Alfred Enoch, Matthew Lewis, Evanna Lynch leh Ian Hart-te pawh inlan leh tur zingah hian an tel.