iHeartRadio-in Taylor Swift Album ‘Taylor’s Version’ chiah an play tawh dawn

iHeartRadio chuan an station hoah chuan Taylor Swift-i'n a hla a record ṭhat ho chiah an play tawh dawn tih an puang.

US-a radio group lian ber iHeartRadio chuan kum 31-a upa American singer Taylor Swift leh industry executive-te inkara master recording chungchanga buaina avanga Taylor Swift-i'n a hla a record thar lehte chiah chu an play tawh dawn tih an sawi a, US-ah iHeart hian station 860 lai an nei a ni.

Company Chief Prog-ramming Officer Tom Poleman chuan,"Taylor-i hian track thar a neih apiangin a hlui zawk kha kan thlak nghal zel a ni," tia sawiin an station-te chuan artist-te'n an hlate mite hriat atana an duh chuah an play dawn tih a sawi bawk.

'Love Story' hitmaker hian a studio album paruk lai mai record ṭhat a tum a, kum 2008-a a tihchhuah 'Fearless' leh kum 2012-a a tihchhuah 'Red'-te chu record ṭha tawhin a tlangzarh ve ve tawh.

November 12 khan 'Red (Taylor's Version)' chu a tlangzarh a, hla thar pakua dah belhin minute 10-a sei film tawi ‘All Too Well’ a tlangzarh nghal bawk a ni. He a album thar hian Spotify lamah record siam nghalin hmeichhe artist album ni khata stream tam ber record a siam a ni.

Studio album pakua lai tlangzarh tawh Swift hian kum 2010-a a tihchhuah 'Speak Now' ama version a tlangzarh leh hmasak ber tur a nih a rinawm a, Taylor Swift, 1989 leh Reputation-te pawh record ṭhata a tlangzarh thar leh tur zingah hian an la tel.

Tuna Swift version chiah play tum tawhtu iHeartRadio hi April, 2008-a din kha niin US-a radio network lian ber an ni mek a, Audacy, TuneIn leh Sirius XM-te ai pawhin an lian zawk a ni. US mai bakah Australia, New Zealand, Canada leh Mexico lamahte pawh an inzar pharh tawh bawk.