Spotify lamah Jaui'n lawm a hlawh, UNI stream a tam

Khawvela music streaming service provider liam ber Spotify-ah Mizo zaithiamte'n an hla an dah nual tawh a, Gospel leh lengzem singer tam tak zai ngaihthlak tur a awm tawh. Chung zingah chuan Jaui hlate'n ngaihthlak a hlawh hlawm a, a hla pathum laiin nuai chuang stream a nei tawh a, Mizo artist dangah Spotify lama hetiang dinhmun thleng thei hi an la awm lo niin a lang.

Jaui hla dahte an stream nasa
Nikum lama Ṭhazual Best Artist Female Lengzem award dawngtu Jaui hian Spotify-ah hian hla 10 lai a dah tawh a, chung zinga hla pathum chuan nuai chuang stream a nei tawh a, a hla hit 'I Hlutna' phei chu nuai 2.7 chuang stream a ni tawh.

'I tan chauh' kha nuai 1.3 vel stream ni tawhin Rebecca Saimawii hla a cover 'Ka thlang ber che' kha nuai chuangin an stream tawh bawk. Jaui hi a hla dang pawhin stream a hlawh tam hlawm viau a, sing chuang stream a neih fur tawh bakah 'Dam chhan' phei chu nuai chuang stream nei thuai tur zingah a tel tih a chiang.

Mizo hla stream nasat ber 'Thinlung khawngaihthlak'?
Francis-a hla hit 'Thinlung khawngaihthlak' kha Spotifty lama Mizo hla hit ber a nih hial a rinawm. Spotify lama Mizo hla awm zawng zawng zawn chhuah vek chu thil harsa tak a ni. Francis-a hla hian stream 3,16,842 lai a nei tawh a, Mizo hlaah chuan he hla aia stream nei tam hi a la awm a rinawm loh. Francis hian 'Ka thi, ka damlo' pawh khan Spotify lamah hian a dah tawh bawk.

Mizo artist hla UNI an ngaithla nasa
Mizo artist pahnih Gnie leh Hriatrengi thawhdunna hla 'UNI' chu vawi 4,42,701 stream a ni tawh a, Mizo artist hlaah chuan he hla hi stream tam ber a ni.

Gnie hla tho Vohbik kha vawi nuai chuang stream a ni tawh bawk.

Hla hit zual ṭhenkhat
Elena HT Par hla 'Melody' kha vawi nuai hnih chuang stream a ni tawh a, Benjamin Sum 'Chhingmitin Biahthu kan hlan' tih kha nuai 2.8 chuang stream a ni tawh bawk. Rpa Ralte hla phuahte stream a tam hlawm a, 'Khuangvang Note' leh 'Tudang ka ngai tawh lo'ng' pawh kha nuai chuang stream a ni tawh.

Kimkima 'I zun ngaih lunglen vangin' kha nuai chuang stream nei tawh zingah a tel a, heng bakah hian nuai chuang stream nei tling Mizo hla eng emaw zat a awm ve tawh bawk.

Gospel singer-te pawhin an hla an dah nual tawh a, tun dinhmunah chuan Lengzem angin stream a la tam em em lo hlawm thung a ni.