Drake hla thar tichhuah hun tur sawn

Canadian rapper, Drake chuan French Montana nena an hla thar a tihchhuah tur, 'Splash Brothers' tih chu kar liam ta Zirtawpni zana Houston, Texas-a Astroworld Festival-a chhiatna thlenga thite zahna lantir nan a tihchhuah hun a sawn tih a sawi.

He festival-a Travis Scott perform laia mipui innekbuaina thleng vang hian mi 10 an thi a, midang 300 chuang hliam tuar an awm bawk. Drake hi he festival-ah hian special guest a ni.

'Splash Brothers' hi nimina Montana studio album tihchhuah, 'They Got Amnesia'-ah telh tum ni mah se Drake hian a la chhuak leh a, an tichhuak tel dawn ta hrih lo a ni. He hla hi album deluxe version-ah an la telh leh dawn a, mahse a chhuah hun tur erawh an la sawi lo.

Montana leh Drake hi a hma pawhin an lo thawkdun fo tawh a, heng zingah hian "Pop That" “Stay Schemin” “No Stylist” leh “No Shopping" te chu an lar hle.