Rebecca St. James-in a hla tharah For KING & COUNTRY a thawhpui

Australian Christian pop rock singer Rebecca St. James chuan Zirtawpni liam ta khan hla thar 'Kingdom Come' a tichhuak a, he hlaah hian Australian pop duo For King & Country a thawhpui a ni.

An hla thar chungchang hi social media lamah tarlangin,"Beiseina leh infuihtharna mamawh tak khawvelah he music video hian malsawmna a thlen che chu kan dilna a ni. Khawvel ram hrang hranga harhna thleng, Isua fakna leh, chhungkaw inpumkhatna tihlana hmuh tur awm hian ka mittui a ti tla hial," tiin a sawi a, for KING & COUNTRY pawhin,"He hla hi harhna dilna hla niin keini min khawih ang hian a khawih ve che kan beisei," tiin an sawi ve bawk.

Rebecca St. James hi a larna a rei tawh a, 1990's velah khan Gospel rimawi huangchhungah chuan hriat a hlawh tawh viau a, kum 1999-ah khan Grammy-ah Best Rock Gospel Album award a lo la daih tawh a ni. A album 'God' leh 'Pray' chu RIAA certified Gold Album a ni pha hial. Kristian film hrang hrangah a inlan nual tawh a, chung zingah chuan kum 2000 chhoa film lar tak 'Left Behind' pawh kha a tel. Nakkum February thlaah hian a studio album 10-na tur 'Kingdom Come' a tlangzarh ang.

For KING & COUNTRY- Joel David Smallbone leh Luke James Smallbone-te hi Rebecca St James unaute an ni nghe nghe a, anni hi tunlaia Gospel duo lar ber zinga mi niin Grammy pawh pali lai an dawng tawh an ni. Zaithiam hrang hrang- Dolly Parton, Timbaland, Tori Kelly, Lecrae leh Needtobreathe-te pawh an lo thawhpui tawh a, tunah hian an farnu hi an thawhpui ve ta a ni. An lar hma chuan an farnu zai hi an pui nasa ṭhin viau nghe nghe.

Kumin GMA Dove Awards-ah khan For KING & COUNTRY hian award pathum lai an dawng a, chung zingah chuan award ngaih-hlut hlawh tak Artist of the Year pawh a tel.