UK chart lamah ABBA leh Taylor Swift an che ṭha

ABBA chuan an comeback-na album 'Voyage' hmangin UK chart lamah chanchin hnutchhiah tlak tak an hnutchhiah leh ta a, chutih rual chuan Taylor Swift pawhin a album thar hmangin UK chart lamah ro a rel ve leh mek bawk.

ABBA 'Voyage' a hlawhtling
‘Waterloo’ hitmaker-te hian kum 40 hnua an album hmasa ber, hla 10 awmna 'Voyage' chu November 5 khan an tlangzarh a, UK bakah ram dang 16 laiah he album hi chart topper a ni.

UK bikah phei chuan an album 10 chart No.1 a nihna a ni tawh a, chumai a la ni lo, kumin chhunga album hralh kal ber ani mek bawk. Tlangzarh a nih aṭanga kar khat chhung khan khawvel ram hrang hrangah album copy maktaduai chuang an hralh der tawh a, vawi 190 vel zet stream a ni tawh nghe nghe!

Kar hmasa chhung chuan an album hit 'GOLD' chu UK-ah BRIT Certified 20x Platinum a kai bawk.

A zawna album pariat chart topper nihpui thei Taylor Swift
Taylor Swift chuan a album tlangzarh thar ber, 'Red' a record ṭhata a tlangzarh nawn leh ngat ‘Red (Taylor’s Version)’ chu UK chart lamah topper a nihpui lehnghal tawh a, heti hian UK chart-ah hian a album tlangzarh hnuhnung pariat chu chart topper a nihpui nghal vek a ni.

Zirtawpni liam ta thleng khan UK-ah hian a album hi copy 72,000 a hralh tawh a, chung zingah 57,000 chu a copy pangngai a hralhna niin a dang zawng chu digital sales aṭanga a hralh a ni thung. Kumin chhunga hmeichhe solo artist album hralh chak ber a ni nghal bawk.

Swift hian kum thum pawh tling loah album panga lai UK No.1 album a nei der a, chungte chu- ‘Lover’ (August 2019), ‘Folklore’ (August 2020), ‘Evermore’ (December 2020) leh ‘Fearless (Taylor’s Version)’ (April 2021)-te kha an ni.

UK-ah hian hmeichhe solo act, No.1 album nei tam ber chu Madonna niin 12 a nei a, a dawtah chuan Taylor Swift leh Kylie Minogue an ni a, anni hian pariat ve ve an nei tawh thung.