Adele album thar '30' a ngaihthlak theih ta

Minute 15-a sei hla a awm, mahse a label lamin an tihtawitir!
English singer Adele chuan Zirtawpni liam ta khan a studio album palina, ngaihven hlawh tak '30' chu a tlangzarh ta e.

Adele hian a album thar hi Melted Stone leh Columbia Records kaltlangin a tlangzarh a, a pasal hlui Simon Konecki nena an inṭhenna album tia sawi theih '30' ah hian hla 12 a awm a, Japanese edition-ah erawh bonus track pathum a dah tel thung.

'30' hian ngaihven a hlawh bawk a niang, tlangzarh a nih hma kar thumah khan Apple music lamah chuan record siam derin, an streaming platform-a album 'pre-add' tam ber a ni a, Billie Eilish-i'n 'Happier Than Ever' hmanga record a lo siam tawh chu a khum a ni.

Minute 15-a sei hla a titawi!
'Easy On Me' singer Adele hian a album tharah hian a tirah chuan minute 15 zeta sei hla a dah tih a sawi a, mahse radio velah awlsam zawka play a nih theihna turin an titawi ta tih a sawi.

Adele chuan a album thar hla 'I Drink Wine' chu a tirah chuan minute 15-a sei a ni tih a sawi a, mahse a record label lamin radio-a play a buaithlak dawn nia an sawi hnuah a titawi ta niin a sawi.

Rolling Stone magazine-in an kawmnaah hemi chungchang hi sawi chhuakin miin a zai chu ngaina hle mah se minute 15 em ema sei hla chu an ngaihthlak peih dawn loh thu record label lamin an hrilh hnuah a titawi leh ta a ni. A titawi tawh chung hian minute 6 chuang zet chu a la ni tho!