Mizo hla inphuah siak lawmman sem a ni ta

Music Domain Mizo­ram (MDM) buatsaih Mizo hla inphuahsiak result puannna leh lawm­man semna chu Thawhlehni zan khan Regency Hotel Con­ference Hall-ah neih a ni a, mi 20 hnenah lawm­man pek an ni.

Mizo hla inphuah siak hi category pahnih - Pathian fakna hla leh lengzem/lenglawng-ahte ṭhen a ni. Pathian fak­na hla bikah Zela Chuau­ngo, Luangmual chuan pakhatna a la a, a hla phuah hi 'Lung­hlu' tih a ni. 'A hmangaih ropui' tih hla phuahtu Lalrinfela (No-a), Republic Veng chua pahnihna a ni a, Lalrindika, Chanmari, Hnahthial chu pathumna a ni. Mi pasarih hnenah consolation prize hlan an ni bawk.

Lengzem/lenglawng-ah hian 'Vawng dun zel ang' tih hla phuahtu Zo­thlamuana (Atea) chuan pakhatna lawmman a la a, Lalhmingmawii Rawi­te (I leng dun zel ang) leh Landry Qholhring (December zan thla) te chuan pahnihna leh pa­thumna an hauh bawk. Lengzem/lenglawng category-ah pawh hian mi pasarih te chuan conso­lation prize an dawng a ni.

Lawmman te hi Van­hnuaithanga te chhung­kuain an fanu Christine Lalhlim­puii hriatreng nan an tumsak a ni.

MDM chuan Mizo hlaphuahsiak hi March thla aṭang khan an kalpui ṭan a, hla 235 zet a lut a ni. Pathian fakna hla 55 a lut a, lengzem/lenglawng hla 80 a lut bawk.

Result puanna leh lawm­man semna hun hi Sa­bina-i'n a host a, Feli Fanai, DJ Lalvenhim, Kimkima, Cindy, Arini, Amtea leh Maruati te an zai bawk.