Indian Box Office ; Salman Khan channa Race 3 a hit Ni ruk chhungin vbch 150 lalut

Hollywood em la tluk lo mah se, Bollywood-ah sum a tam tih a lang a, Salman Khan channa Race 3 chuan tlangzarh aṭanga kar khat pawh a liam hmain Rs. vbch 150 zet a lalut hem mai.

Race 3 hi June 15 khan tlang­zarh a ni a, a hit nghal rem rem hle. Bollywood superstar Salman Khan leh Jacqueline Fernandez te channa film hi tunlai film chhuak thar zinga ngaihven hlawh leh sum thawk chhuak hnem ber a ni mek a, India bakah khawvel hmun dang aṭang pawhin sum athawk chhuak hnem hle a ni.

He film sim nana an budget hi vbch 150 a ni a, tlangzarh aṭanga kar khat pawh a liam hmain a senso an hmuchhuak der tawh.

Indian Box Office-a ro rel mektu Race 3 hian tunkar chhungin vbch 200 a lakluh tlin hman a rinawm hle. Salman Khan, Jacqueline Fernandez leh Daisy Shah te chuan an film lo hlutsaktute chunga lawmthu sawi nan special video message an siam hial a ni.

Race 3 hi Indian filmmaker lar Remo D’Souza kut chhuak a ni a, a changtute pawh hi Bollywood-a sulhnu nei ṭha tak tak an ni hlawm. Kumin chhunga film chhuak tawh zinga tlangzarh nia sum lalut hnem ber (Rs 29 crore) a ni a, record a siam. Tiger Shroff channa Baaghi 2 khan vbch 25.10 a laut a, hei hi khumin, Deepika Padukone channa Padmaavat (Rs 19 crore) pawh a khum chiang hle a ni.

Salman Khan hian record duhawm tak a nei a, a channa film film pathum - Bajrangi Bhaijaan, Sultan leh Tiger Zinda Hai te chuan tlangzarh aṭanga ni thum chhungin vbch 100 an lalut tling vek a ni. Race 3 hmangin a record neih sa hi a chhunzawm leh ta bawk a ni.

Race 3 hi India bikah chuan hmun 4,200-ah chhuah a ni tawh a, khawpui lian hrang hrangaha chhuah chhoh mek zel a la ni bawk.