Ronaldo leh Georgina Rodriguez an inhual?

Portugal superstar Critiano Ronaldo chuan mi bik anih zia field chungah a pholang a, football stadium pawn lamah pawh boruak a nei leh hat mai. Rus­sia-a a inkhel en tura kal Spanish model Georgina Rodriguez nen an inhual niin, me­dia-te chuan an tarlang.

Georgina Rodriguez hian Nilaini zana Por­tugal leh Morocco inkhel kha a hmunah a en a, Ronaldo-a'n chakna goal a thun chiah khan lawm avangin mipui zingah a lo zuang ve tawr tawr a ni. Luzhniki Stadium chhunga a chetla lai vel hi an lo chik viau a ni awm a, diamond ring a bun tih an hmu. Hei hi inhualna zungbunah an ngai a, Ronaldo nen hian an inhual niin mi tam tak chuan an ngai a ni.

Rodriguez hian Ronaldo hming chuanna jersey sen a ha a, mipui tam tak zinga en hlawh bik a ni. Ronaldo leh Georgina Rodriguez te hi kum 2016 aṭang khan an inzui ṭan a, fa pakhat an nei tawh. Innei tura inhual anga thawm a rik mek lai hian, an mahni lam chuan thuchhuah an la siam lo thung.