Thih hnuah XXXTentacion-a'n record a siam

American rapper XXX­Tentacion chu tunkar Thawhṭanni zing khan Florida-ah kah hlum a ni a, music khawvel a deng chhuak hneh hle. Music huangah chuan a thihna hi a tawpna a ni mai lo a, a hla hit 'SAD' hmangin record a la siam cheu mai.

June 19 khan a hla hi mi maktaduai 10.4 chuang zetin Spotify-ah an stream a, ni khat thil thua stream nasat ber a ni. Kum 20 mi rapper hian Taylor Swift-i'n kum 2017-a record a lo siam tawh chu a khum a ni. Swift hla 'Look What You Made Me Do' hi ni khatah mi maktaduai 10.1 in an lo stream tawh a ni.

XXTentacion hi tunlai rapper zingah chuan hmabak nei eng ber pawla ngaih a nih vangin uitu pawh a ngah hle a ni. Hei hi record a siam hian a tichiang hle a, a thih hnuah pawh mi ngaihven ber a la ni.

XXTentacion hi a hming tak chu Jahseh Onfroy a ni a, SUV car a khalh lai chu mi tu tih hriat lohin a kap hlum a a ni. A thih dan hi chhui zui mek a la ni a, thu chiang hriat a la ni lo.