Aizawlah Tennis inelna lian

Mizoram Tennis Association (MTA) chuan tualchhung tennis inelna tih hmasawn nan promoter Aijal Club leh Media Partner Zonet Cable TV Pvt. Ltd. nen ṭangkawpin 1st Aijal Club Challenger Tennis League an buatsaih dawn. Nimin tlai khan Aijal Club-ah MTA aiawhin president Chalrosanga (Mavala), Aijal Club aiawhin vice president Rinsanga leh Zonet aiawhin general manager LV Lalthantluanga ten inremna thuthlung an ziak.

He inremna ang chuan Aijal Club-in he inelna senso an tum ang a, Zonet-in media coverage a pe thung dawn a ni. Zonet hian tennis hma hian football inelna Mizoram Premier League, basketball inelna Mizoram Super League, badminton inelna Mizoram Badminton League, table tennis inelna Mizoram Hexa League bakah Mixed Martial Fight inelna Mizoram Fight League te chu hlawhtling takin a lo kalpui tawh a ni.

Mizorama tennis inelna lian ber hi August 11, 2018 aṭangin Aizawl Tennis Court-ah kheh ṭan tur a ni dawn. He tournament hi team anga khelh tur a ni a, team turte hi puanzar leh tur a ni ang. Team tin hian Mizoram pawn player an nei ṭheuh dawn a, Mizoram a tennis tournament-ah chuan a pui ber tur a ni dawn. Team inelna a nih angin category paruk Mens, Mixed, 35 chunglam, Junior, Ladies & Open a khelh tur a ni dawn bawk.

MTA president Mavala chuan "MTA hian mellung thar kan kai a, Mizoram Tennis chhungkuate chuan kan hre reng dawn a ni. Mizo tennis players-te hian theihna ṭha tak kan nei a, international level pawh kan thlen theih hi ka ring tlat a ni. 1st Aijal Club Challenger Tennis League hi a hlawhtlin ngei ka beisei a, promoter Aijal Club leh kan media partner Zonet te chungah MTA chuan lawmthu kan sawi takzet a ni." tiin a sawi.