Mystical Mizoram Ṭhazual Lengzem ; Manuna 'Thinlung hliam' pakhatna a ni

Mystical Mizoram Ṭhazual Lengzem chart-ah Manuna hun a rawn thleng leh ta. A hla la tharlam tak 'Thinlung hliam' hmangin chart-ah pakhatna a ni.

Manuna 'Thinlung hliam' chu
Thla hnih vel liam taah khan Hard Ray vocalist Manuna chuan hla thar 'Thinlung hliam' chu music video hmuhnawm tak nen a tichhuak a, video hmuh a nuamin a hla a mawi bawk a, thla hnih chhung velin YouTube lamah pawh thlirtu nuai li dawn a nei der tawh.

He hla hi ama phuah a ni nghe nghe a, a awm mil tak hla niin music video classic raih nen rawn chhawp chhuakin chart lamah pawh a lang nghal vat a ni. Chart-ah hian hma sawn chho zelin chart hmasa lamah khan pathumna a ni a, tunah erawh pakhatnaah a rawn inhlangkai ta a ni.

Manuna hi Ṭhazual chart lamah hian a che ṭha ṭhin viau a, chart leh lama a dinhmun tur pawh hriat a chakawm tawh viau.

Pahnihnaah pawh Manuna tho -
Feli Fanai & Manuna 'Tuaktharte'

Tunṭum chart chu Manuna chet ṭhatna chart a ni e. Chart pahnihna pawh Feli Fanai nena an sak, uluk taka music video an siam 'Tuaktharte' kha a ni. He hla hi chart hmasa lamah khan pangana a ni a, tunah erawh pahnihna a ni der tawh.

Top 5-a langte chu
Mizo rilrem zawng tak hla hmanga Zofate thiam taka min awi ṭhintu R Lalruatkima chuan a hla mawi tak 'Lo haw thuai thuai' chu pathumna a nihpui a, Ngurthansanga pawh top 5-ah rawn inhlangkaiin 'Sawmfang hmun mawi' chu palina a ni.

Mizo lengzem singer zinga huhang ngah ber pawl Jaui chuan 'Min hmangaih rawh' hmangin top 5 a rawn khar bawk.

Lengzem artist nei ṭha MDM lam Ṭhazual chart hi a hot lehpek viau. Top 10-ah hian zaithiam mi hriat hlawh chho mek Apuii Chhangte, lengzem singer mipa zinga lawm hlawh ber pawl JT Production, Ṭhazual award best female artist Zaii Hauchhum, Mizo ṭhalaite'n an duh rawn Shin Bia leh MYC Perhkhuang star Lalhmangaihzuali (Nunui)-te pawh an lang a ni.