Bangtan boys an Thleng Sáng tual tual

Pathianni zan khan American Music Awards vawi 49-na Cardi B host-na hnuaiah Microsoft Theater, Los Angeles-ah sem a ni a, Silk Sonic duo Bruno Mars and Anderson. Paak-te chuan ropui takin show an hawng. Kumin AMA-ah hian BTS, Doja Cat leh Megan Thee Stallion-te chuan award pathum ṭheuh an hum haw.

US lamah lawm hlawh BTS
Bangtan Boys hian nominee an nihna category zawng zawngah award an dawng vek. Rimawi lam award an sem reng renga award ngaihhlut hlawh ber leh miin an ngaihven hmasak ber ṭhin. Artist of the Year award chu BTS hian an dawng. He category-ah hian Ariana Grande, Drake, Olivia Rodrigo, Taylor Swift leh The Weeknd te nen an awm hoa a, chung khawthlang artist huhang ngah tak tak chuan BTS hi an tluk zo ta lo a ni.

Favorite Duo or Group – Pop award chu BTS hian an dawng bawk a, tin, an hla 'Butter' vangin Favorite Song – Pop award an dawng bawk.

Doja Cat leh Megan Thee Stallion
Doja Cat chuan SZA nena an thawhdunna 'Kiss me more' vangin Colloboration of the Year award a dawng a, Favorite Female Artist – R&B award leh a album 'Planet Her' hmangin Favorite Album – R&B award a dawng bawk a ni.

Megan Thee Stallion pawh award pathum hum haw zingah telin Favorite Female Artist – Hip-Hop, Favorite Trending Song leh Favorite Album – Hip-Hop award-te a dawng.

Sawi hmaih theih loh Taylor Swift leh Olivia Rodrigo
Taylor Swift hian a vawi lina atan Favorite Pop Album a dawng leh a, chu chu record a ni. Favorite Female Pop Artist award pawh a vawi rukna atan dawng lehin chupawh chu record bawk a ni! He award hi a zawnin kum li a dawng tawh a, hmeichhe artist a zawna kum li dawng thei awmchhun a la ni cheu!

Nomination hmu tam ber, category pasarih laia nominee Olivia Rodrigo chuan New Artist of the Year award a dawng a, ani hian award hum haw tam lo mah se Grammy lamah erawh a chet ṭhat ring sa an tam hle.