Oasis reunion duhtu Liam Gallagher

Oasis singer ṭhin Liam Gallagher chuan midang­te ṭanpuina turin Oasis re­union neih a phut thu sawiin, reunion gig an neih aṭanga an sum hmuhchhuah zawng zawng chu National Health Service hnena pek vek a duh thu a sawi.

Kum 47 mi Liam Gallagher hian a unaupa Noel Gallagher chu an band din ṭhat puiah a hian a sawm a, coronavirus hri leng a reh fel velah charity gig neih a, an sum hmuh­chhuah zawng zanwg chu UK-a hriselna lam hna thawktu NHS tana pek a duh thu a sawi bawk.

Hemi chungchang hi a hma pawhin a lo sawi chhuak fo tawh a, Thawhlehni pawh khan a twitter-ah sawi chhuak leh a, kum 11 liam taa an band kehdarh aṭang khan a uanupa chu a ngai hle a, koh kir leh a duh thu a sawi bawk a ni. 

English rock band Oasis hi kum 1991 khan Manchester-ah an indin a, Liam Gallagher hi vocalist niin a unaupa Noel hi guitarist a ni thung. A tirah tak chuan Noel hian a zawm nghal lo a,  Paul Arthurs (guitar), Paul McGuigan (bass guitar) leh Tony McCarroll (drums)-te nen an din hnauh Noel hian a zawm ve chauh a, British band hlawhtling ber zinga mi an ni nghe nghe.

Chawimawina pawh an dawng hnem hle a, band line-up chu in­thlak danglam fo mah se hlawhtling takin an kal reng a, mahse kum 2009 khan Liam leh Noel-te inhmuhthiam loh vangin an kehdarh a ni.