Jessie J-i'n zai rei a tum!

Duh zawng a inang lo ang bawkin, thil tih chak zawng pawh a inpersan thei hle mai. English singer lar Jessie J chuan kum 90 mi a nih hunah Vegas-ah zai a duh thu a sawi mauh mai.

'Price Tag' hitmaker chuan, "Kum 90 mi ka nih hunah chuan Vegas-ah zai ka duh dawn a, catsuit nen 'Price Tag' ngei mai hi sak ka duh dawn a ni" tiin a sawi. Kum 30 mi hian hemi chungchang hi tun hnai khan interview-ah a sawi chhuak a, a tum ram thleng turin hma bak a ko hle.

Jessie J hian 'The Voice' leh 'The X Factor' ahte hnuhma a lo nei tawh a, zai lam chawlh san a la tum mai lo bawk. Album palina tur a buaipui mek a, heta hla pakhat 'R.O.S.E.' chu kum li hnu a vawi khat nan a tichhuak. Tun hnai khan a single thar 'Queen' chu a lo tichhuak tawh bawk.