'Ghostbusters: Afterlife'-in 'Eternals' a nék chhuak

North America Box Office-ah November 19-a tlangzarh 'Ghostbusters: Afterlife' chuan ro a rel nghal a, kar hnih chhung rorel tawh 'Eternals' dinhmun a rawn chhuhsak ta a ni.

Beisei ang vel sum laluttu 'Ghostbusters: Afterlife'
'Ghostbusters: Afterlife' hian kar tawp liam ta chhung khan theatre 4,315 aṭangin $44,008,406 a lalut a, sum lalut tam ber a ni. US pawn lamah $16,000,000 lalut bawkin a sum lakluh zawng zawng zat chu $60,008,406 a ni a, beisei lawk ang zat vel sum a lalut.

Ghostbusters film palina hi kum 1989-a tlangzarh 'Ghostbusters II' aṭanga kum 32 hnua an tlangzarh ang bawkin kum 32 hnua thil thleng anga chan a ni. CinemaCon-ah August 23 khan puangzar lawk loin an chhuah thut tawh a, Zirtawpni khan theatre hrang hranga chhuah turin an tlangzarh thung. He film chungchangah hian film review-tute ngaihdan a inang lo hle a, Rotten Tomatoes lamah chuan mi 221-in an review aṭangin rating 6.10/10 a hmu.

Carrie Coon, Finn Wolfhard, Mckenna Grace leh Paul Rudd-te channa hian kar hnih chhung rorel tawh 'Eternals' an nek chhuak a, an sum lakluh pawh a inthlau hle. Hetihlai hian 'Eternals' chu pahnihna a ni thung a, theatre 4,055 laiah la chhuah tho mah se $11,084,855 chauh a lalut tawh.

Pathumna chu kar hmasa lama pahnihna Clifford the Big Red Dog kha niin $8,121,777 a lalut a ni.

'King Richard' palina a ni phak ṭawk
Venus leh Serena Williams-te pa Richard Williams-a chanchin film-a an siam 'King Richard' pawh Zirtawpni khan tlangzarh a ni a, Box Office lamah a che ṭha lua lo thung. Theatre 3,302-ah chhuah a ni a, $5,406,033 a lalut a ni.

Will Smith-a channa film hi film review-tu lam erawh chuan an fak hlawm hle a, Rotten Tomates lamah rating 7.6/10 a hmu phak.

Film thar a awm nual e
Box Office top 10-ah film thar pahnih- 'Ghostbusters: Afterlife' leh 'King Richard' te chiah hi lang mah se Box Office Mojo chart lamah erawh film thar a awm nual. India Sweets and Spices (16), C'mon C'mon (18), The First Wave (19), The Youngest Evangelist (23), Kurt Vonnegut: Unstuck in Time (24), Bad Luck Banging or Loony Porn (27), I Was a Simple Man (28), The Feast (29) leh Below the Fold (30)-nate chu film thar an ni.

Box Office top 10:-
1 Ghostbusters: Afterlife $44,008,406
2 Eternals $11,084,855
3 Clifford the Big Red Dog $8,121,777
4 King Richard $5,406,033
5 Dune $3,174,916
6 Venom: Let There Be Carnage $2,910,607
7 No Time to Die $2,765,272
8 The French Dispatch $1,000,091
9 Belfast $945,425
10 Ron's Gone Wrong $942,066