In House siam 'Ka Bialnu' en theih dawn

Social media lam hriat hlawh Drew Pachuau chuan film puitling a sual chhuak ta - a hming chu 'Ka Bialnu' tih a ni. In House Production neitu Drew-a ziah leh direct film hi November 26, Zirtawpni zan dar 8:00 aṭangin Lersia App aṭanga en theih a ni dawn.

In House hian tun hmain short film an lo siam nual tawh a, YouTube lama dah niin Mizo mipui ten an hlutsak ṭhin hle. Tun ṭum ami erawh film puitling, darkar khat leh a chanve aia rei a ni dawn a, uluk leh fimkhur taka siam a nih avangin a hmuhnawm a rinawm.

Film director Drew Pachuau chuan, "Tun laia Mizo film kan hmuh ṭhin ṭhenkhat ai chuan a danglam deuh ang. Thil thleng tak tak behchhana siam a ni a, a mihring erawh thlak an ni thung. Romance comedy leh crime chawlhpawlh a ni dawn.

"Film puitling kan vawi khat siamna a nih avangin beisei neih dan pawh thiam a har. Min puitu leh thlawptu an tam a, story lama min hmansak an tam avangin beisei pawh kan nei sang ve hle, chutih rualin eng ang taka beisei san tur nge pawh kan la hrethiam rih lo," tiin Vanglaini a hrilh.

Ka Bialnu Official Sound Track (OST) ah hian tunlai zaithiam lar Kimkima a inrawlh dawn a, a mawi ang tih kha ring tawp mai rawh. Film hmuhnawm bakah music mawi tak a rawn keng tel dawn tihna a nih chu.

Short Film lama an hmel kan hmuh ve fo tawh - Lianpuia chu a changtupa a ni dawn, ani bakah hian Duata, Freddy leh Baby te an ni a, tawnhriat la ngah lo mah se talent an neih miau avangin en a chakawm tawh.