Utqiagvik, kumin chhunga ni hmu tawh lo tur khua chu

Alaska-a khaw pakhat, Utqiagvik-ah chuan kar hmasa Ningani khan ni a tla a, kumin chhung chuan he khuaah hian ni a chhuak tawh dawn lo!

Utqiagvik hi a hming hmasa chu Barrow a ni a, kum 2016 khan Utqiagvik tiin a hming hi an thlak a ni. November 18 khan he khuaah hian kumin atan chuan ni a tla fel a, nakkum January 22-ah he khua hian ni a hmu leh dawn chauh. Hetih lai hian nipuiah chuan he khua hian ni 80 vel zet, zan awm loin ni an hmu ve ṭhin thung a ni.

US Alaska state-a North Slope Borough-a khawpui lian ber a ni a, US-ah hmar tawpa khaw awm niin, khawvela khaw awm hmar tawp ber zinga mi a ni bawk. Alaska state-a khaw awm hoah hian mi cheng an tlem ṭhin a, kum 2020 chhiarpuiah khan Utqiagvik-ah hian mi 4,927 chiah an awm chungin Alaksa khaw hrang hrang zinga mihring cheng tam 12-na a ni pha tho.

Utqiagvik ram neitu tak takte chu Iñupiat mite an ni a, AD 500 vel aṭang khan helai hmunah hian Iñupiat-te hi an cheng tawh niin mi thiamte chuan an sawi. Kum 1881-ah daih tawh khan US Army-te chuan he khuaah hian meteorological leh magnetic research station an lo din daih tawh nghe nghe.

Thil dangdai deuh chu, Utqiagvik khua hian an ram khawpui Washington DC aiin Tokyo, Japan, leh St. Petersburg, Russia-te a hnaih zawk!

A chhan chu maw...

Mizoram University lama climate change chungchanga research timek Gabriel Lal-chhandama chuan hemi chungchanga Vanglaini palai zawhna chhangin, kan chenna Khawvel (Earth) awm dan hi tlemin a he deuh a (23.5 degree-in), chumi vang chuan ram hrang hranga awmte'n season hrang hranga kan ni eng dawn dan a inan loh thu a sawi.

"Khawvel awm dan a he miau avangin ni eng kan dawn dan a inang lo a, chumi a nih avang chuan North Pole lam hnaih, Alaska leh a chhevela awmte leh South Pole lama awmte chuan ni eng an dawn dan a inang lo hle. Thla tam tak ni chhuah loh leh tlak miah loh hunte pawh an tawng ṭhin a ni," a ti.