Taylor Swift-i'n Billboard chart Rawng senin a luan

Taylor Swift chuan kar hmasa khan kum 2012-a a tihchhuah a album 'Red' a record ṭhat 'Red (Taylor's Version)' chu a tlangzarh a, Billboard chart hrang hrangah a che ṭha nghal rem rem hle.

Billboard 200 chart a sen

Taylor Swift 'Red (Taylor's Version)' chu kar hmasa chhunga US mipuiin an ngaihthlak tam ber album a ni a, MRC Data aṭanga a lan dan chuan he album hian equivalent album unit 605,000 a hmu chhuak a,chuta ṭanga 325,000 zet chu album a hralhna niin, Drake album 'Certified Lover Boy' tih lohah chuan kumin chhunga album EAU hmu chhuak tam ber a ni.

Bruno Mars leh Anderson .Paak-te R&B duo 'Silk Sonic' chu Taylor Swift hnaih bertu an ni a, heti chung hian an EAU hmuh chhuah zat a inthlau rem rem hle. Silk Sonic hian an album thar 'An Evening With Silk Sonic' hmangin EAU 104,000 a hmu chhuak. TWICE 'Formula of Love: O+T=<3' chu pathumna a ni thung.

Taylor Swift hian Billboard-ah hian mellung pawimawh tak a phun. A album 10 lai mai chu Billboard 200 chart-ah pakhatna a nihpui thei a, hmeichhe zingah ani aia dinhmun sang zawk pakhat chiah a awm, chu chu Barbra Streisand niin album 11 Billboard 200 chart topper a nihpui tawh ■

Hot 100 chart pawh a sen

Billboard Hot 100 chart lamah pawh Taylor Swift bawk hian ro a rel a, ‘All Too Well (Taylor’s Version)’ hmangin chart topper a ni.

November 12-18 inkar khan ‘All Too Well (Taylor’s Version)’ hi US-ah chuan vawi maktaduai 54.4 lai stream a ni a, radio airplay audience impression 286,000 nei bawkin download aṭanga hralh 57,800 lai a awm bawk.

Hot 100 chart-a No.1 hla pariat a neihna chiah a ni a, hetiang dinhmun thleng thei artist 20-na chiah niin hmeichhe zingah chuan pasarihna a ni thung. He hla hi Swift-in Hot 100 chart top 10 hla 30 a neihna chiah a ni bawk a, chutiang dinhmun thleng thei artist chu paruk chiah an la awm.

Chumai a la ni lo, he chart-ah hian ‘Red (Taylor’s Version)’-a hla 26 lai chu zu han lang a! He album-ah hian hla 30 a awm a, chung zinga 26 lai chu US single chart ngaih hlutah hian a lang thei a ni.

Kar eng emaw zat chart topper ni tawh Adele 'Easy on Me' chu pahnihna a ni ve thung a, The Kid LAROI & Justin Bieber 'Stay' chu pathumna a ni ve bawk.

Chart dang neuh neuh pawh a sen

‘All Too Well (Taylor’s Version)’ hi Billboard Global Excl. US leh Global 200 chart-ah pawh topper a ni a, 'Red (Taylor's Version)' hi Album chart lamah pawh pakhatna ni nghalin, Artist 100 chart lamah pawh Swift hian ro a rel nghal a ni.