Bee Gees frontman Barry Gibb Knighthood pek a ni
Pop music group Bee Gees frontman Barry Gibb chu Thawhlehni khan Buckingham Palace-ah knighthood nihna hlan a ni. English singer hi Prince Charles chuan knighthood nihna hi a hlan a, sawm bikten an ṭawiawm a ni.
Bee Gees Barry Gibb chuan, "Chawimawina ropui tak a ni, sawifiah thiam a har hle mai. Robin leh Maurice Gibb te khan min va chhuang dawn em!" tiin, a bandmate leh a unau ni bawk fam tate hming a lam chhuak hial.
Kum 71 mi Barry Gibb chuan sawizawmin, "Robin leh Maurice te awm lo se, he hmunah hian chawimawiin ka awm hauh lo ang. Vawiin hian la dam ni se chuan min va chhuang dawn tak em" tiin a sawi. Gibb hian mi bik tlem te hnena chauh an pek 'Sir' nihna chu anei ve ta a, Sir Barry Gibb tia sawi a ni tawh ang.
Sulhnu ropui
Kum 1958 khan pop music group 'Bee Gees' hi unau pathum - Barry, Robin leh Maurice Gibban te chuan an din a, 1960s -1970s vel kha an lar vang lai a ni. Kum 2003 thleng khan mipui hmaah an inlan a, hemi hnu hian 2009-2012 khan an rawn inlar leh bawk.
Bee Gees hian an hla te hi copy maktaduai 220 chuang zet an hralh a, khawvel huap pawha a ber kai phak an ni. Kum 1997 khan Rock and Roll Hall of Fame-ah lakluh an ni bawk.
Bee Gees' Hall of Fame citation-ah hian, 'Elvis Presley, the Beatles, Michael Jackson, Garth Brooks leh Paul McCartney te chauh chu the Bee Gees aia record nei ṭha an awm' tih a inziak a ni.
Kum 2003 khan Maurice chu kum 53 mi niin a thi a, hemi hnu hian Barry leh Robin te chuan music an chawlhsan zui a ni. Kum 45 chhung zet group anga an lo chet chhuah tawh chu bansan mah se, Robin chuan 2009 khan Barry chuan a sawmna pawmin Bee Gees hminga perform leh a remtih thu a puang leh a ni.
Hun eng emaw chen mipui hmaa an inlan leh hnuah Robin hi May 2012 khan kum 62 mi niin a boral ve leh a, Barry Gibb chauh hi Bee Gees member zinga dam awm chhun a ni ta a ni.