'Thingtlang tlangval' film kan hmu dawn!

Hmeithai fa pakhat, thingtlang aṭanga Aizawla college kal, a nuna har­satna leh buaina tam tak tawk chanchin tarlanna 'Thingtlang tlangval' tih film chu siam a ni dawn.

Film siam lama hnu­hma nei ṭha tak Mal­sawma Fanai leh Mapuia Chawngthu te chuan he film hi an buaipui dawn. Mihring hmanga sumdwnna lam hawi tarlanna 'WHERE" film siamtu Malsawma Fanai chu director a ni dawn a, Mapuia Chawngthu chu director of photograpy a ni ang. A script hi PUC-a lecturer Malsawma Lai­lung ziah a ni a, Robert Lalhmingthanga'n a produce dawn thung a ni.

A changtu tur te
Mizo zingah pawh film star tia sawi tur an awm ve ta nual a, tun ṭumah pawh hian an hmel kan lo hmuh tawh ṭhinte pawh an chang leh dawn.

Zaithiam Rosy K. Remsangpui pawh a inlan dawn a, a ni bakah hian hmel thar hmuh tur an awm nual bawk dawn. Romance & musical film a nih ang ngeiin, zaithiam leh lam thiam eng emaw zat kan hmu dawn bawk. He film-a inlan tur thlanna screen test chu nimin khan Zarkawt Recreation Center-ah neih a ni bawk.

Engtin zel?
'Thingtlang tlangval' film hi July thla aṭang hian shooting neih ṭan tura ruahman a ni. Aizawl leh thintlang a inlan chhawk dawn a nih hmel a, college a lang zing viau dawn bawk. He film hi kumin chhunga tihchhuah hman tura ruahman niin, October-ah chuan tlangzarh hman beisei a ni.