Zauvi music video hmasa ber 'Ṭhenrual Hlui' a chhuak ta

Zaithiam hriat hlawh chho mek Zauvi (JauiGiggles) chuan a official music video hmasa ber 'Ṭhenrual Hlui' chu a tlangzarh ve ta.

He hla hi Patea Khiangte phuah niin, hla lungkuai leh lung tileng thei tur tak a ni. Ṭhian hlui ngaihna lam hla niin, Mizo te rilrem zawng tak leh sakpui nuam tak a ni.

Music video hi Siama (SVP) kutchhuak niin, Blue Wave Records label aṭangin tih chhuah a ni. Shooting hi Reiek leh Durtlang-ahte neih niin, hmuh a nuam hle.

Talent nei ṭha bik
Zauvi hian talent ṭha tak a nei a, chu chu a hlawhtlinpui chho mek zel. A zai hi Live Wire-ahte hmuh tur a awm zauh zauh a, G'nie hla 'Thinlunga sernung' tih hlaah khan a pui a ni. BCA various artistes ah khan a tel ve bawk.

Nikuma N.E.Body Can Sing North East solo competition, Shillong-a neihah khan Mizo hla leh sap hla sa turin Mizoram aiawh tura tirh niin, pahnihna a ni. He tah hian Etta James & Lady Gaga hla a sa a, lawm a hlawh hle a ni.

A talent hi hriain Blue Wave chuan an thahwpui a, hmachhawp hrang hrang an nei nual. Hla record sa tihchhuah mai tur an nei nual tawh a, a zai ngaithlak tur a awm chho nual dawn.

Zauvi hian hla phuah lam pawh a ti thei viau bawk a, Mizo hla-a la awm zen zen lo hla dangdai tak a nei hnai bawk. Music tam lo, bass kaihhruaina ang chi hla te pawh nikum lam aṭang khan a lo buatpui tawh bawk. A demo phei chu Miss Mizoram lai khan background music atan hman a ni nghe nghe. Soul lam a tui pui viau bawk.