Drake album thar 'Scorpion' tlangzarh ; Zaithiam lar a thawhpui hnem
Canadian rapper Drake chuan album panga-na 'Scorpion' chu nimin khan a tlangzarh leh ta. He album tharah hian hla 25 zet a awm a, zaithiam lar eng emaw zat a thawhpui a ni.
Drake album thar hi side 'A' leh 'B' ah ṭhen a ni a, lei theih tura chhawpchhuah nghal a ni. He album-ah hian JAY-Z, Nicki Minaj, Future, Ty Dolla $ign leh Static Major te a thawhpui a, Michael Jackson aw pawh hriat tur a awm a, ngaihthlak manhla tur tak a ni. Canadian hip-hop star double-album ah hian a hla hit 'God’s Plan, 'Nice for What' leh 'I’m Upset' te pawh khung tel a ni.
Fan lam an phur
Drake hian album a tichhuah tawh te a hlawhtlinpui thei hle a, record pawh a siam nual tawh. Tun ṭuma a album pawh hi beiseina a sang leh pek hle a, fan te pawh an phur hle.
A album zinga hlawhtling bera chhal ngam 'Views' chu April 2016 khan a tlangzarh a, a hit rem rem hle. Drake hian Billboard album chart-ah 'Views' hi a lo hlawhtlinpui tawh a, a zawnin ṭum riat zet No.1 a hauh a ni. Kum tam a vei hmain a rawn inlar leh nghal chat a, chart hrang hrangah kan hmu leh mawlh mawlhin a rinawm.